WILLEMSTAD.- Hefe di VDC, Michael Römer pa medio di su abogado Berti Braam ta konsiderando pa bai korte pa haña kontesta di parti gobièrnu ki dia e por regresá su trabou bèk. Ayera den parlamento promé minister Whiteman a indiká ku a entamá un investigashon dje servisio i ta wardando esaki. Mr. Braam den deklarashon na EXTRA a indiká ku for di dia 9 di desèmber, despues ku resultado di investigashon di ministerio públiko ta konosí, el a entregá un karta na nòmber di su kliente sr. Römer na tantu promé minister Whiteman i minister di hustisia. Pero te ainda e no a haña kontesta di e karta aki.

E karta tabata pa sa ki dia ta kita su kliente for di ta non-aktif, i ku e por regresá su trabou. Pero manera indiká, e abogado ni sr. Römer no a tene nada di gobièrnu. Un siman a pasa sin haña kontesta. E abogado ta haña ku no por tene hende riba non-aktif, awor ku investigashon di echo ta tras di lomba i no a saka nada afó. P’esei sr. Braam ta konsiderá pa hiba gobièrnu korte pa haña un klaridat den status di su kliente.

Dia 8 di desèmber ministerio públiko a informá ku no tabatin motibu pa investigashon penal kontra di hefe di VDC. Esaki despues ku tabatin notisia ku e hefe di VDC lo a menasá su amiga ku arma di kandela. OM riba su mes a disidí pa hasi investigashon. A resultá ku

tur esnan direktamente envolví a keda skuchá dor di Landsrecherche Curaçao, i tur ta ninga ku tabata tin kuestion di menasa i ku una arma di kandela a keda mustrá.

Debí ku no tabatin echo kastigabel, pero si Prokuradó-general a konsehá minister riba e punto aki. E konseho ta pa ordená un investigashon mas profundo dor di agensia di inteligensia VDC mes òf dor di nombra un komishon pa hasi esaki.

Ayera promé minister a indiká ku e investigashon aki ta andando i ta warda riba e resultado.

Bron: Extra