WILLEMSTAD.- SOAB ta kasi kla ku investigashon den kaso di edifisio den Pietermaai i tambe e seramentu di laman den área di Baoase.
Despues ku tabatin basta werewere rònt di e porta ku Baoase a poné riba kaminda públiko di Drielstraat, i ku porsierto a ser kita riba òrdu di ROP òf Servisio pa Planifikashon Urbano – ántes DROV, tin indikashon ku ainda e resort luhoso no ta kumpliendo ku tur rekisito legal.
Segun Abogado Achim Henriquez a bisa Deya Mensche di NTR Caribisch, ku Baoase a skùif e hekinan infractor riba tereno ku a ser di dèmpel ilegalmente, pero ku ineksplikablemente a haña pèrmit di konstrukshon di DROV i Domeinbeheer.
E estado di e beach ta unu deplorabel, unda ainda stakanan di heru ta sali fo’i awa i un boka di kloaka relativamente nobo, ta hasiendo esaki inusabel.
Minister di Transporte, Tráfiko i Planifikashon Urbano, Suzy Camelia- Römer, ta spera pronto di haña e rapòrt di SOAB, kende ta investigando e legalidat di e proseso di pèrmit, i ta di opinion ku esun ku a susha e beach, mester drech’é den e estado original. Minister Suzy Camelia– Römer a indiká ku Domeinbeheer ta kabando e investigashon riba e proseso di pèrmit di konstrukshon di Baoase i tambe SOAB, kende ta investigando e asuntu di Pietermaai.
Camelia– Römer ta kere ku niun minister por traha sin mandato paso e aparato ta muchu grandi, i si retirá esaki, tur kos lo pega mirando e magnitut di pèrmit ku ta keda pidi i prosesá. “Si algu a bai robes prosedural òf ta un persona a hasi algu robes humanamente, mester atendé esaki korektivamente”, e minister a splika.
Sra. Camelia – Römer a enfatisá ku promé ku husga, SOAB i Domeinbeheer mester konkluí nan investigashon, ku e ta spera di haña den e siman benidero, pa asina e por tuma akshon.
Bron: Extra
Naschrift KKC