WILLEMSTAD.- Efektivonan di Landsrecherche kabamentu di siman pasá a skucha hefe di Servisio di Inteligensia di Kòrsou i ta konkluyendo nan investigashon di echonan riba e persona a base di un enkargo ku nan a haña di prokurador general Guus Schram.

Abogado Bertie Braam tabata presente ora a skucha Michael Romer enfátikamente a splika ku a skucha su kliente komo testigu i no komo sospechoso. Un fiskal ku tambe tabata presente na e skuchamentu a bisa e abogado ku e siman aki mes ta konkluí e investigashon pa entrega rapòrt djesaki na prokurador general i por bisa e ora ei ku e investigashon ta sera.

Abogado Bertie Braam a reiterá ku hinter e asuntu aki ta basá riba redu infundá ku ta karesé asta e mínimo base di verasidat, Su kliente a desmentí semper i e supuesto víktima tambe a desmentí el a duna di konosé. E kaso a dura dos luna kaba i mester pone fin na esaki i lanta e medida di órden ku a imponé kontra su kliente e abogado a bisa. El a reiterá mas aleu ku su kliente ke bai traha bek i asta ta kla pa tuma riendanan dje servisio ku el a dirigí pa sinku aña i piku kaba. Riba e pregunta kiko lo pasa si outoridatnan lokal, por ehèmpel promé minister Ben Whiteman òf prokurador general disidí ku su kliente no por bai bek na su puesto na VDC, abogado Braam a bisa ku algu asina no ta ni ko’i pensa riba dje.

Den mesun rosea el a indiká ku den un senario asina lo tin di pensa riba otro pasonan ku por òf mester tuma.

Bron: Extra