WILLEMSTAD,- ‘Situashon di sèlnan na Rio Canario no ta optimal. Tin fayonan di infrastruktura ku a tuma lugá i tambe fayonan tékniko. Huntu nan a kontribuí na un situashon na unda sinku persona por a hui.’ Asina Minister di Hustisia Quincy Girigorie a splika ayera.
Manera ta konosí djadumingu último sinku persona a hui for di kompleho di Polis na Rio Canario. Minister Girigorie, despues ku el a tuma nota di esaki, a bai personalmente na Rio Canario pa tira un bista na situashon i pa papia ku trahadónan. ‘M’a pidi Mando Polisial pa un rapòrt tokante kiko a tuma lugá. Di e sinku persona ku a hui, te ainda a detené tres. Pero dos te ainda no.’
Tokante e sèlnan na Rio Canario Girigorie a bisa e siguiente: ‘Ta mas ku opvio ku pa basta aña kaba tantu sèlnan na Rio Canario i na Barber no ta apto pa karga hende.’ Djadumingu anochi mes Girigorie a duna òrdu pa tantu na Warda di Polis na Rio Canario komo Warda di Polis na Barber no por sera niun hende mas.
Uniko eksepshon ta pa hende indokumentá ku Polis ta arestá den oranan di anochi. Te ainda posibilidat ta keda habri pa Polis seranan na Rio Canario òf Barber. Esaki debí na e situashon ku Sentro di Korekshon Kòrsou ta sera porta 10 or di anochi, pa habri bek e siguiente mainta. Den e kaso ku Polis arestá hende indokumentá nan por keda sera pa algun ora na Rio Canario òf Barder. Despues Polis por hiba nan na Sentro di Korekshon. Djaluna otro siman Girigorie lo reuní ku tur hende konserní pa deliberá tokante tur detayenan di e situashon. Girigorie ta splika ku tantu rapòrt a keda skirbi tokante situashon den e sèlnan di Rio Canario i Barber. ‘Riolering no ta funshoná, seguridat no ta optimal. E situashonnan simplemente no ta humano pa sera hende pa mas ku algun ora.’
Bron: Extra
