Gobièrnu ta sigui papia ku sindikatonan
Willemstad – Djaluna 20 di ougùstùs ministernan demishonario Sra. Jacinta Scoop-Constancia, Sr. Carlos Trinidad i Sr. Hensley Koeiman ta sinta na mesa ku representantenan di algun sindikato. Ta trata aki di un reunion ku ta kontinuashon di un enkuentro ku a tuma lugá dia 25 di yüli último. Durante di e enkuentro aki e sindikatonan a duna di konosé na Konseho di Minister ku nan ke partisipá den e proseso di formulá maneho di gobièrnu.
Durante di e promé reunion Konseho di Minister a papia ku Sr. Wendy Calmes di ABVO, Sra. Coromoto Maria di CBV, Cedrik Hudson di STKO, Edmond Francisca di STK, Dennis Daal di PWFC i Wendell Meulens di UGTK/CADMU. Ku e representantenan aki Ministernan di Salubridat Públiko, Medio Ambiente i Naturalesa, Maneho di Gobernashon, Planifikashon i Servisio Públiko ta bai sinta na mesa djaluna awor pa sigui elaborá riba e petishon di e sindikatonan.
Durante di e promé enkuentro promé minister (awor demishonario) Sr. Gerrit Schotte a proponé pa traha un ‘position paper’ kaminda ta formulá kon por lanta un plataforma bipartit ku despues por ser ekstendé ku representantenan di sektor privá i empresarial.