Den otro informe polisial nos por reportá ku polis a identifiká e dos personanan ku a keda hañá morto ayera den dos diferente kaso. Nos a reportá riba e mortonan lamentabel aki den nos boletin di ayera nochi.
E promé kaso ta e kurpa sin bida ku tabata drif den Bahia di Santa Ana, na altura di Brug Emma. E notifikashon a drenta na sentral di polis algu pasá di 9 ayera mainta. Ku ayudo di personal di KTK i un suidadano a saka e persona for di awa.
Alrededor di 9’or i 40 dòkter di polis a konstatá morto di e hòmber Pedro Leonardo PHILIPA, nasé na Kòrsou 18 yanüari 1938. Riba òrdu di fiskal di Ministerio Públiko a konfiská e kurpa sin bida pa mas investigashon. Tabatin hopi hende den sentro di siudat na e momentu ei i esaki sigur tabata algu lamentabel pa eksperensiá. Mas den oranan di atardi, alrededor di mitar di sinku, Sentral di Polis a haña informashon ku den un kas na Montaña Rey tin un hòmber drumi riba un kama i un plas di sanger abou na suela. E patruya ku a yega na e sitio a topa ku un hòmber drumi riba kama i no tabata duna señal di bida. Dòkter di polis a konstatá morto di e hòmber Joseph James FAIRBAIRN, nasé na Kòrsou, 30 yüli 1949.
Riba òrdu di fiskal di Ministerio Públiko a konfiská e kurpa di e persona aki tambe pa mas investigashon.

Bron: Telecuracao