Durante di e reunion publico pa apertura di e refineria, a bini critica contra di e apertura cu tabata tin di haci cu posibel riesgonan di un refineria.
A menciona e riesgo di e sushi di e refineria pa nos salud, e riesgo sushamento di nos medio ambiente, e riesgo cu e compania CITGO lo no por cumpli cu su responsabilidadnan, e riesgo di e entrada di mucho hende di afo pa bin traha na Aruba. Pa motibo di tur e riesgonan aki, segun esnan cu a menciona esakinan, Parlamento lo mester a vota contra di e apertura di e refineria. Den reaccion riba e critica di tur e riesgonan menciona, Rene Herde’ di AVP a mustra cu tur e riesgonan aki a wordo analisa prome cu a sera e acuerdonan, pa tin bon bista di tur posibel riesgo y con pa maneha esakinan. Banda di esey Rene Herde a mustra cu pa casi 90 aña nos tin un refineria cu tur e riesgonan cu a menicona y wak con bon Aruba a maneha e riesgonan ey over di tur e añanan aki.
161002 quote babe ruth
SIN MIEDO
Rene Herde’ a mustra cu pa loke ta e riesgo financiero di e compania CITGO, gobierno di Aruba for di comienso a laga gobierno di Hulanda haci un analisis di e compania, pa haya sa si e ta capaz di carga un proyecto cu un inversion asina grandi. E resultado a sali positivo. Pa loke ta e riesgonan pa nos salud y medio ambiente, e acuerdo cu gobierno di Aruba a sera ta bisa cu e compania CITGO lo percura pa e refineria traha a base di gas natural cu ta hopi mas limpi cu e petrolio di antes. Tambe lo haci uzo di tecnologia nobo pa uza e gas CO2 cu wordo emiti pa traha “algen”, cu por usa den hopi forma na Aruba y den exterior. Kier mne cu e gas CO2 no lo bay den aire sin mas. Pa loke ta e riesgo di hopi hende di afo cu lo por bin traha na Aruba, gobierno a fiha limite na e cantidad di hende di afo. Gobierno lo percura pa training di nos hendenan pa mas di nan cu ta posibel haya trabou. Ademas, no ta prome biaha cu Aruba ta wordo confronta cu e riesgo cu hopi hende ta bin traha y biba na Aruba. A base di experiencia na Aruba mes y den exterior, lo organisa hunto cu CITGO e trabounan na e refineria, pa limita e cantidad di hende cu ta bin y keda. Rene Herde: “E riesgonan ta conoci. Nos tin experiencia di pasado. Nos por maneha e riesgonan cu experiencia cu nos tin y cu uso di tecnologia cu antes no tabata tin. E refineria lo mester tin menos impacto riba medio ambiente cu den pasado.”
E conclusion di tur e riesgonan conoci aki, no mester ta cu no ta habri e refineria, segun Rene Herde’. Cu referencia na un expresion di e legendario hungador di baseball Baby Ruth, Rene Herde’ a bisa: “Nunca bo mester laga miedo stroba Bo di haci algo. Baby Ruth a bisa cu Bo no por laga e miedo di ponche, kita bo di bate. Nos no por laga e miedo di riesgonan kita nos di haci loke nos kier. Nos mester analisa tur cos bon. Nos mester actua cu cautela y responsabel. Pero nos mester tin confiansa den nos mes y usa tur experiencia cu tin. Esey ta exactamente loke nan ta haci awor. Bo no por laga e miedo di faya pone bo keda sin actua”. Asina Rene Herde’ a bisa.
Bron: ArenaPolitico