Athunto, nos reakshon riba fiamentu di plaka dor di Gabinete Schotte.

GABINETE SCHOTTE A FIA NAF 1,700 MION I A UZA

MIONES DI RESERVA DI FONDO DI PENSHON (AOV)

Willemstad – “Debidamente na final di òktober 2010 Gabinete Schotte a fia plaka. A fia NAF 1,700 mión for di Ulanda via di emishon di bono”. Na palabra Alex Rosaria, lider di frakshon di Partido PAIS den Staten reakshonando riba e echo ku den Parlamento miembronan di Frakshon MFK ta insistí den nan mentira di no a fia plaka.

Den un reakshon MFK a bisa ku bèrdat tabatin un fiansa pero ku esaki tabata parti di lokual e kabinete promé ku 10-10-10 a negosiá. Rosaria:

“E echo ku ta otro hende a negoshá e fiansa aki no ta relevante. Relevante ta ku ta Gabinete Schotte a firmé. Si un hende bai un banko komersial i negoshá un fiansa pa mi i mi firma esaki, ta ami a fia e plaka i no e persona ku a negosi’é pa mi. Pues si Gabinete Schotte no tabata di akuerdo ku un fiansa ku un otro a negoshá, e no mester a firm’é”.

Despues di e fiansa na fin di òktober 2010 ta bèrdat ku Gabinete Schotte no a fia mas plaka.
Esaki no pasombra e Gabinete a hiba un bon maneho, pero pasombra CFT a prohibí nan fia mas plaka. Netamente pa e motibu aki, Gabinete Schotte – en bista ku a sera kranchi di fiamentu di plaka – a kuminsá gasta reservanan di nos pais. Prinsipalmente reservanan di penshon (AOV).
I lo ta pa e motibu aki mes Staten riba 14 yüni 2012 asta miembronan di MFK (Pisas, Koeyers, Thodé, Rozier i Garmers) a desaprobá e maneho finansiero hibá pa e mandatario di MFK enkargá ku finansa, bisando den un moshon riba e fecha ei ku:

“ta desaprobá e manera ku George Jamaloodin a hiba e atministrashon finansiero di pais”.

Mirando e track record aki, ta rekomendabel pa MFK, sigur riba e tereno di finansa públiko, realisá ku e mihó kos ku e por hasi ta keda ketu i stop di gaña,”

Rosaria a bisa finalmente.

Geef een reactie

Het e-mailadres wordt niet gepubliceerd. Vereiste velden zijn gemarkeerd met *