Ban yuda Kòrsou den 2 luna

RUMANNAN, KÒRSOU mester di un partido polítiko stabil ku den korto tempu por kita hopi voto for di Helmin Wiels i Pueblo Soberano. Ta Pueblo Soberano ta e faktor di destrukshon, e partido ku a kousa asina tantu desòrdu i intrankilidat den e pueblo aki. Sòri pa e par di hendenan ku mi ta apresiá den PS. E organisashon polítiko Pueblo Soberano a resultá di ta puru rabia, odio i vengansa. Un partido kankan di venenu, nada di amor ni komprenshon pa hende. Mira e manera hostíl i agitá ku Helmin Wiels ta papia i ekspresá su mes versus miembronan di e komunidat aki [kasi semper basá riba insulto, humiashon un tras di otro]! Anto finalmente t’esaki ta krea instabilidat den gobernashon, daña e klima di bida en general na Kòrsou, afektando prinsipalmente e relashon entre suidadanonan di e teritorio aki. Partido Frente Obrero a presentá su mes komo un posibilidat pa kambio, ounke e Soberanoitnan ta borotá di tur forma pa stroba Anthony Godett. Nan lo bisa ku Godett lo tabata dispuesto pa traha atrobe den un gobièrnu ku PAR. Pero, salbashon di Kòrsou for di destrukshon total i abismo ta dependé si partido Pueblo Soberano sigui krese òf nò. Rekompensá Helmin Wiels i Pueblo Soberano no opstante loke el a kousa Kòrsou durante e apénas 20 lunanan di gobernashon di gabinete Schotte, ta e kos mas horibel ku nos por kometé ku nos mes. Ke men e kambio real pa Kòrsou pa loke ta e elekshon di 19 di òktober benidero mester bini di e huki aki (esta den seno di potensial votadónan pa Pueblo Soberano). Enbes di goberná Helmin Wiels a pasa e pueblo aki den trastòrnu, kreando un esfera di sufrimentu total. Binti luna di amargura kousá pa un konstante fustigamentu kontra yunan di e pueblo aki mester ta sufisiente pa nos tur siña ku no por kontinuá ku destrukshon di e pueblo aki. A yega e momento pa ban un otro direkshon, poniendo énfasis riba hustisia, rèspèt pa kada suidadano di e komunidat aki. Pa salba Kòrsou di un desaster humano sin komparashon mester di un partido polítiko barbará, dispuesto pa drenta barionan, tuma e tempu nesesario i kòmbersá abiertamente ku nos hendenan. Hasi tur posibel pa partido Pueblo Soberano kai bek te na apénas un asiento den Parlamento! Despues nos por uni forsa, traha huntu den pas i harmonia ku otro, krea un ambiente di rèspèt mutuo pa lanta Kòrsou i posishoná e pueblo aki na un puesto respetá den mundu. Por fabor, papi’é den bo famia i ku bo amigunan!

ERWIN RAPHAËLA
Curaçao

Geef een reactie

Het e-mailadres wordt niet gepubliceerd. Vereiste velden zijn gemarkeerd met *