Despues di mas ku dos luna ku el a huí, polis ta logra detené Luigino Winklaar durante un entrada hudisial. E hóben di 15 aña tabata será na JJIC, antes GOG.
E kaso aki tabatin hopi atenshon den prensa mirando ku Luigino Winklaar ta ruman di Judeska i Lindomar Winklaar, kende ambos ta sintando kastigu di prizon pa asesinato kruel di un pareha algun aña pasá. Awe tardi agentenan polisial i tim di aresto a realisá un entrada hudisial na un adrès na Gato, spesífikamente e área konosí komo Kurá di Porko, kaminda nan a arestá Winklaar. Nan a boei dos otro hòmber tambe kende al final nan no a detené. Na salida for di e área, e tim hudisial a kontra ku un outo ku tabata bayendo den direkshon di e adrès i a para shofur di e outo aki i realisá un kòntròl. Nan no a detené. Despues e tim a bai un di dos adrès, kaminda tambe nan a hasi un entrada hudisial. No ta konosí si a konfiská algu for di akinan. Luigino Winklaar ta bèk pues den man di hustisia despues di su huida dia 21 di yuli último.
Bron: Telecuracao