Elekshon 2012 ‘onverwacht’

UN BIAHA mas nos ta pará dilanti elekshon. Un biaha mas pueblo di Kòrsou ta den e ambiente di propaganda na radio, televishon i korant. Tur tipo di bandera riba kaya, bishita di polítikonan na nos porta, ken tin falta ken no tin falta, ken por ken no por, en todo kaso un kantidat di ekspreshon rondó di elekshon. Kòrda si ku e elekshon aki no tabata den ‘planning’. Ta ‘issue’-nan di prinsipio a okashoná e situashon i gobièrnu a yama elekshon promé ku el a pèrdè sosten den Parlamentu. Abo komo suidadano sa kon importante bo derecho di voto ta? Semper mi tabatin e pregunta dikon nunka nos no ta rekordá e prinsipio ku a instalá elekshon liber pa nos pais. Dr. M.F.da Costa Gomez tabata e promé polítiko ku a inisiá e lucha kontra dominio kolonial pa establesé outonomia riba 15 desèmber 1954. A instalá elekshon liber kada kuater aña den pais su areglo de estado. Meta di elekshon ta pa pueblo para ketu na gobernashon di pais i vota pa un Parlamento nobo. E Parlamento nobo ta tuma posishon di e Parlamento saliente i ta forma un gobièrnu nobo. Pueblo para ketu… bo sa ki balor bo tin awor, bo sa kuantu bo ta bal awor, bo tabata sa ku bo tin mas poder ku e polítiko ei. Te ku poko dia ei ku bo tabata ‘loko loko’ pa bo por a topa ku un polítiko, aworakí bo ta bai topa e polítiko aki ‘pa loko’. Pueblo den bo man bo tin un arma, e arma ku bo tin ei bo por skohe tres kos, bo futuro, futuro di pais òf futuro dje polítiko. Nos tin algun siman pa nos sinta analisá profundamente kiko nos ta bai hasi dia 19 di òktober i medionan di komunikashon tin un tarea importantísimo pa konsientisá pueblo pa hasi su eskoho. Mi ke animábo pueblo ‘apesar ku bo ta kansá i fadá di baibinnan di polítikonan, bo mester bai vota si, pero laga bo konsenshi, bo sano huisio, bo balor propio i dignidat hiba bo na un eskoho ideal pe pais’. Echo ta e mundu ku polítikonan ta bibando aki na Kòrsou, pueblo no tin pia pa karg’é mas. Skucha nan, analisá nan bon profundo, pa despues di 19 di òktober nos tur tin e satisfakshon i mira bèk ku porfin e biaha aki si pueblo a tuma e mihó desishon di historia. No laga ni bandera, ni steker, ni T-shirt, ni ambiente i tampoko emoshon di elekshon konfundíbo. ‘Wake up’ i ban pa e realidat.

QUILLAN SILVANO
Kòrsou

Geef een reactie

Het e-mailadres wordt niet gepubliceerd. Vereiste velden zijn gemarkeerd met *