WILLEMSTAD,- Minister di Desaroyo Ekonómiko Eugene Rhuggenaath ayera a firma un ‘Memorandum of Understanding’ ku sr. Shawn Sullivan di kompania Airbnb.
Segun Rhuggenaath ta importante ku gobièrnu ta kolektá tur impuesto den turismo. Den e kuadro aki ayera a firma huntu ku ministerio di Finansa un akuerdo ku e kompania merikano Airbnb. Riba wèpsait di Airbnb siudadano por ofresé nan kas òf apartamento pa turistanan.
Por ta un kamber den un kas òf un vila kompleto. Via e wèpsait por reglá ku e turistanan por keda den e akomodashonnan. Pagamentu ta bai via e wèpsait. Segun sr. Shawn Sullivan di Airbnb den aña 2016 600 hende na Kòrsou a ofresé un akomodashon via e wèpsait. Aña pasá mas òf ménos 10.000 hende a keda na Kòrsou via un di e akomodashonnan ku nan a hür via wèpsait di Airbnb.
Den e memorandum òf Understanding, ku a keda firma ayera, ta reglá ku Airbnb ta informá gobièrnu di Kòrsou tokante tur hende ku a hür un akomodashon na Kòrsou via e wèpsait, pa asina duna ministerio di Finansa oportunidat pa kobra tur impuesto enbolbí. Na su banda e kompania lo habri e wèpsait pa promové Kòrsou komo destinashon turístiko.
Segun Rhuggenaath e akuerdo ku Airbnb ta interesante pa nos turismo i nos finansa. Segun Sullivan di tur hende ku den aña 2016 a usa wèpsait di airbnb pa buk un akomodashon na Kòrsou, 65 porshento ta for di Oropa. Sullivan: ‘Segun nos tin un kantidat hopi mas grandi di hende for di Merka ku por ta interesá pa bin Kòrsou. Awendia hopi turistanan ta buska un destinashon nobo, úniko i outéntiko.
Kòrsou ta un destinashon ku ta interesante pa un kantidat grandi di turistanan for di Merka. P’esei mi ta kere ku ta interesante pa nos i pa Kòrsou si nos ta generá mas atenshon pa e isla via nos wèpsait.’ Sullivan ta splika ku hende ku ta usa e wèpsait ta hopi diverso: ‘Hende hóben, hende avansá, famianan, gruponan, parehanan ku mucha i sin mucha. Tambe mi ta kere ku tin hopi mas hende na Kòrsou ku por inskribí nan mes ku posibel akomodashon.’
Bron: Extra