KRALENDIJK — E kaso DRUM a konosé un desaroyo interesante ayera nochi ora ku un tim di aresto a invadí un kaya den bario Belnem, kaminda a arestá sinku hòmber latino sospechá di ta involukrá den e kaso aki, ku a kosta bida di e funshonario polisial Ferry Bakx, awe ta nèt dos siman pasá.

Djaluna mainta tempran a arestá kaba hòmber Rashid S. komo sospechoso den e kaso aki ku a konmové komunidat boneriano. Riba òrdu di Ministerio Públiko BES, den kuadro di e investigashon DRUM di KPCN, dor di un koperashon estrecho entre KPCN, RST, KMar, Nationale Politie, Kuerpo Polisial di Aruba, Kuerpo Polisial di Kòrsou i Warda Kosta a realisá e detenshonnan aki.

Konforme informashon ku KPCN a suministrá, e detenshonnan a tuma lugá den Kaya Gemini na Boneiru ku sosten di tim di aresto di Kòrsou. Despues di e detenshonnan aki a kuminsá listra den e bibienda den kuadro di e investigashon.

Den kuadro pa no stroba e investigashon KPCN no a kompartí e datonan personal eksakto di e sospechosonan.

Riba 17 di ougùstùs último Sentral di Polis a risibí e notifikashon di un ladronisia ku ta tumando lugá den un kas den e bario di Sabadeco. Na momento ku e patruya a yega na e kas nan a tuma nota di dos hòmber sospechoso den e kas.

E sospechosonan ku mira polis a sali na kareda i konsekuentemente a surgi un persekushon na unda e sospechosonan a los bala riba polis ku e resultado ku un di nan a haña bala.

E tiru(nan) ku a alkansá e polis a lag’é den un situashon kritiko i mester a transport’é ku urgensia pa hòspital na unda esfuersonan médiko a keda hasi pero finalmente el a fayesé.

Te na e momentonan aki tin un total di 6 persona detené komo sospecho anto no ta deskartá e posibilidat di mas detenshon.

E kaso ta kontinuá bou di investigashon.

Bron: Extra