WILLEMSTAD.- Frakshon di partido MFK no ta di akuerdo ku gobièrnu a duna proyekto di “Bachelor Opleiding Policing” pa kuerpo polisial den man di e kompania ICUC International B.V.

Segun MFK ‘a konstatá ku ta otorgá hinter e trayekto aki na un universidat ku no ta operashonal, ku otro palabra no tin ningun dosente den servisio, e universidat no ta dispone di un lokalidat pa duna lès i no tin ningun studiante ku ta bishitá awe e universidat aki.”

Tur esaki tin di haber ku desishon di gobièrnu pa duna proyekto di e estudio den man di kompania ICUC International BV. Minister di Hustisia Nelson Navarro, durante reunion di parlamento djamars pasá, a splika ku e universidat aki no tin niun studiante i ku ta un pòst adrès so e tin na kaminda Cas Grandi # 79.’ Doño di ICUC International BV ta Carl Camelia. Riba e adrès Camelia ta biba huntu ku su kasá, minister di Tráfiko, Transporte i Planifikashon Urbano Suzy Camelia-Römer.

Segun MFK tin motibunan sufisiente pa Kontrolaria General (ARC) kuminsá ku un investigashon. ‘Mirando e desepshon ku ta biba bou di sindikatonan di kuerpo polisial, pueblo di Kòrsou i tambe nos komo parlamentario, nos ta urgi ARC pa hasi e loke nan ta nesesario pa hasi e investigashon aki.
Ku e yamada na ARC pa hasi un investigashon, MFK ta sigui riba e dos moshonnan ku e partido a entregá, pero ku a keda rechasá. Meta di e promé moshon tabata pa para e trayekto di “Bachelor Opleiding Policing” i aloká e 5,6 mion (kosto total di e proyekto) pa nesesidatnan mas urgente den nos komunidat.’

MFK tambe a manda ARC ‘informashon ku ta prueba diferente violashon, prueba ku minister ya a start konforme, “Landsbesluit” di 30 di desèmber 2014 ku ta mará na e Rijkswet, publiká den Staatscourant dia 21 yüli 2010 # 11398 i tambe den Curaçaose Courant dia 27 di ougùstùs 2010, # 3, un trayekto via di ORV pa trein polis na nivel di ‘Bachelor’ i tambe e dokumento ku konseho di minister a basa su mes pa tuma e desishon di otorgá ICUC International B.V. na 26 di òktober 2016 un proyekto na balor di 5.6 mion den 5 aña”.

Bron: Extra