WILLEMSTAD.- E parlamentario Yael Plet a hasi denunsia ku kier a soborn’é pa su asiento den parlamento pa laga gobièrnu kai. Sinembargo el a nenga esaki, i despues di a papia ku su partido, a hasi keho na Ministerio Públiko.

Ounke ku Plet no ke a divulgá e suma pa kual a aserk’é pa tumba gobièrnu, EXTRA a komprondé for di su fuentenan ku ta trata di un suma riba di 300 mil florin.

Gabinete Koeiman a kai dia 12 di febrüari na momentu ku marcha di Kabai tabata pasa den nos kayanan.

Plet den deklarashon pa EXTRA a bisa ku for di promé ku 12 di febrüari, a aserk’é i a ofresé un suma di plaka p’e bira independiente den parlamento. Pero Plet a nenga i a notifiká su partido di esaki i despues a hasi denunsia. Manera ariba indiká, Plet no ke a bisa e suma.

Riba pregunta di EXTRA si ta hende di Bloke 11, Plet a bisa ku e no sa ta di kua banda nan ta. Pero un kos e sa sigur ku si a pidié pa tumba gobièrnu i bira independiente den parlamento, ta sigur ku ke forma gobièrnu sin partido MAN aden.
Plet a sigui bisa ku el a sintié intimidá kon hende ta aserk’é pa kometé tipo di aktonan aki, intimid’é di su inteligensia, intimid’é di su kapasidat.

“Mi a lanta bashí i lo mi muri bashí. Semper mi a traha duru. Dia mi tin hopi sèn, ta dia mi a gana premio mayó”.
Plet a bisa ku su denunsia e ke manda señal pa esnan ku ta hasi e akto aki por komprondé no ta pasobra e ta hóben, edat chikí, ta nobo ta kere ku por kumpra su inteligensia i kapasidat. Ademas e ke pa respetá e hóben ku no ta partisipá den kos ilegal i tampoko ta ambisioso pa kos.

Plet ta kere ku mester atendé e kos aki, i pa para e tipo di aktonan aki ku no ta yuda e kousa, i pueblo no ta bai dilanti ku e práktikanan aki.

“Mi ta un hóben sinsero, rekto i kosnan ku ta ilegal mi no ta ‘doe mee’ den nan”.
Alabes el a bisa EXTRA ku e no tin miedu di niun hende, e no ta gaña i no ta lanta falsu testimonio. E sa ku e tin protekshon di Dios Tata. Plet a haña sosten total di su partido, famia i di hopi sostenedó.

Ministerio Públiko a konfirmá pa EXTRA di e denunsia hasí. E prosedura den e kaso aki ta ku Plet ku ta un parlamentario mester hasi su denunsia na Landsrecherche ku ta traha un dokumentashon di e denunsia i investigashon. Landsrecherche ta pasa e dokumentashon aki pa fiskal di ministerio públiko ku ta wak si tin sufisiente prueba pa kuminsá ku un persekushon penal.

Bron: Extra