WILLEMSTAD.- Minister di Hustisia Ornelio “Kid” Martina ayera atardi a entregá kódigo di komportashon (gedragscode) “Regla ta regla” na hefe di e diferente kuerponan ku ta kai bou di Ministerio di Hustisia: Kuerpo Polisial, Landsrecherche, Interpol, Kustwacht i Opleidingsinstituut & Veiligheidszorg (ORV).
E kódigo di komportashon ta un medio pa yuda duna guia den situashonnan delikado. Algun luna pasá, dia 28 di sèptèmber 2016, hefenan di Kuerpo Polisial Kòrsou, Landsrecherche Curaçao, Interpol, Kustwacht, ORV huntu ku representante di ABVO, NAPB i SAP a firma e kódigo di komportashon pa e kuerponan menshoná. For ougùstùs 2015 un grupo di trabou ku ta konsistí di representante di bòntnan ABVO, NAPB i SAP, representante di Ministerio Públiko, representante di maneho Direktorado di Hustisia, un kriminólogo/ eksperto investigadó (gecertificeerd fraude examinator) i representante di e kuerponan menshoná, ta reuní pa yega na un kódigo di komportashon.
Di òktober 2015 pa yüli 2016, e lidernan riba nivel táktiko i stratégiko i operashonal di e kuerponan menshoná a partisipá na tres tayer. Den e promé tayer a repasá e reglanan den e buki di Integridat (Integriteitscodeboekje).
Den e di dos tayer a trata kon pa atendé ku reglanan di integridat manera ta stipulá den e buki di integridat i e konsepto di komportashon.
Den e di tres a trata e tema, traha “bo” mes presupuesto i kon atendé problema di debe. Ekspertonan di ARBO, Optima i Banko Sentral tabata oradónan durante workshop.
Punto di salida ta ku e Kódigo di Komportashon lo keda duná na personal riba nivel operashonal. Miéntras tantu e grupo di trabou ta trata funshon di persona di konfiansa, intimidashon seksual na trabou i violensia relashonal pa e gruponan táktiko, stratégiko i operashonal.
Minister di Hustisia Ornelio “Kid” Martina ayera a entregá kódigo di komportashon “Regla ta regla” na hefe di e diferente kuerponan: Kuerpo Polisial, Landsrecherche, Interpol, Kustwacht i Opleidingsinstituut & Veiligheidszorg…
Bron: Extra