WILLEMSTAD.- Ayera durante oranan di atardi pa di tantísimo biaha sentral di polis a risibí informashon di un kandela ku lo mester tin den área di Veeris.
Mesora a manda unidat di bombero Mundu Nobo na e sitio.

Pero na nan yegada mester a pidi refuerso di mas unidat di bombero pa yuda kombatí e kandela ku tabata produsí hopi huma den e área.

Asta mester a bai den área di Sambil pa por buska mas awa debí ku e kandela tabata asina grandi i esaki tabata eksigí hopi awa.

E kandela a keda sende den un área ku tabata difísil pa e trùk di bombero yega serka.

Na e sitio EXTRA a kombersá ku algun abitante ku a indiká ku ya algun tempu nan a drenta den un situashon di pániko.

A bira kustumber ku muchanan baldadi i tambe adultonan den e área ta sende diferente mondi na kandela sin sa ki peliger esaki por kousa.

Den e último lunanan esaki a bin ta pasa praktikamente tur siman.
I kada biaha e kandelanan aki ta kandela grandi.

Kada biaha outoridatnan ta presentá na e sitio, i ta papia ku bisiñanan pero nunka ta kue esun òf esnan kulpabel.

Na vários okashon ku a logra mira ken tabata sende e mondinan na kandela, bisiñanan a indiká na polis, pero tòg no a pone man riba e kulpabelnan.
E abitantenan ta spera ku outoridatnan por bai atendé ku e asuntu aki ku man duru pa evitá ku lo por lamentá despues.

Bron: Extra