WILLEMSTAD. – Abogado mr. Eldon ‘Peppie’ Sulvaran tabata tèrko djamars mainta ora ku el a trese su kritiká filete dilanti kontra di e loke ku el a opservá, esta kon Prokurador General a subi trapinan di Palasio di Hustisia huntu ku representante di Gobernador i ora di bandoná e edifisio, nan a baha huntu tambe.

Sulvaran su punto di bista ta, kon por ta posibel, ku Prokurador General ku ta e órgano ku ta pleita pa ekstraditá e tres kurasoleñonan pa Merka ta kana man na man ku e órgano ku tin di tuma e desishon final si ta manda e tres yu di Kòrsou aki Merka òf no.

E punto di bista di Sulvaran, el a trese dilanti promé ku el a kuminsá motivá su nota di defensa di 21 página. Den su asina yamá nota preliminar, el a splika ku dia 3 di sèptèmber Korte Superior (HOF) a laga e tuma desishon den man di Gobernador si ta ekstraditá e tres yunan di Kòrsou òf no pa Merka.

E pregunta ta, kon Gobernador ku mester ta e órgano neutral, ta kana kasi man tene ku Prokurador drenta sali palasio di hustisia. Esaki ta krea e impreshon ku ya tin un desishon tuma kaba den e loke ku ta bai pasa.

Pa duna un ehèmpel dikon e ta pensa asina, Sulvaran a mustra riba un ekspreshon di Abogado General durante un di e prosesonan ku a tuma lugá un siman pasá. Abogado General a bisa ku hopi énfasis na Korte ku, ‘e lo sòru pa gobernador no tuma niun desishon promé ku korte yega na un konklushon’.
Mirando e desaroyo aki, Sulvaran a pidi korte pa no ekstraditá e tres siudadanonan pa Merka. Mirando e echo ku gobernadó no ta imparsial i no por tuma e desishon.

Bron: Extra