WILLEMSTAD. – Ounke ku e tribunal di Korte Superior a duna di konosé ku mas pronto posibel nan lo tuma un desishon den e kaso ku Francesco Corallo a entamá pa e haña su pertinensianan bèk, mester indiká ku ya tres siman a pasa sin ku ainda e tribunal por tuma un desishon den e kaso aki. Ta trata di pertinensianan ku outoridatnan hudisial a tuma den beslag durante un entrada hudisial ku a tuma lugá den luna di novèmber di aña pasá.
Den luna di novèmber di aña pasá riba petishon di hustisia di Italia, agentenan di RST a realisá entradanan hudisial den residensia di Cortallo i tambe den su negoshinan ku e tin na St. Maarten.
Manera menshoná e petishon pa realisá entradanan hudisial den Corallo su negoshi i kasnan, a bin di direktorado anti mafia na Italia.
Ta konosí ku na ougùstùs di 2013 Corallo den un forma boluntario a bai Italia pa duna un testimonio na outoridatnan hudisial i despues di aki el a keda pone na aresto domisilario te ku òktober 14.
E interogashon di e tempu ei a bai riba un investigashon relashoná ku froude na “Banco Popolare di Milano”.
Manera ta konosí e interogashon a tuma lugá den un seshon porta será i niun partido no ta laga nada slèk kiko e tuma lugá den e kaso aki ni kiko ta e kosnan ku hustisia e tempu ei a tuma den beslag.
No ta konosí tampoko si e kosnan tumá den beslag ketu bai ta den man di outoridatnan na St. Maarten òf ku a manda nan Italia.
Dia 3 di febrüari e kaso a keda tratá aki na Kòrsou kaminda ku e tòp penalista nan ta mr. Eldon “Peppie” Sulvaran i tambe mr. Gerard Spong di Ulanda tabatin e interesnan di Francesco Corallo na nan enkargo.
E kaso a keda tratá konforme artíkulonan 150 jo. 563 insiso 4.
Manera ya menshoná e tribunal ku a atendé e kaso aki a duna di konosé ku denter pronto nan lo tin un desishon riba e loke ku e abogadonan a trese dilanti na nòmber di Corallo.
Bron: Extra