WILLEMSTAD.- Aki seis siman un veredikto lo kai den e kaso di apelashon di Kontrolaria General kontra e kompania UTS. Esaki lo bira un veredikto ku lo por ser konsiderá komo komprometido (bindend) manera UTS mes a pidi den e prome kaso.
Demas esaki lo por ser konsidera komo un veredikto mas limpi tambe, den e sentido ku partidonan a presenta e biaha aki sin ku unu tabatin ventaha riba e otro.
E presentashon di partidonan e biaha kai tabata muchu mas balansá, mientras ku e hues aki tabatin mas oido pa ponensia di partidonan.
Manera ta konosí, na luna di aprel dje aña aki e dos partidonan a bai un disputa den korte i finalmente UTS a Sali vensedó. T’asina ku tabatin un desishon di Parlamento ku ta instruí Kontrolaria pa hasi un ouditoria den UTS, ya ku tabatin sospecho ku e maneho diario ta laga di deseá i ku lo tin kosnan ku no por mira lus di dia.
Algun luna pasa Kontrolaria a bai korte ku UTS den un intento pa e por haña entrada den e kompania pa por hasi sierto investigashonnan. Kontrolaria mester a bai korte ya ku gerensia di e kompania a nenga entrada di Kontrolaria alegando ku e tin su propio akountent interno i eksterno. Pero Kontrolaria a basá su mes riba un desishon/moshon di Parlamento ku a instruí e entidat aki pa hasi un ouditoria den UTS, ya ku tin sospecho ku lo tin kosnan ta sosodiendo ku no por mira lus di dia. Pero finalmente Kontrolaria a bin pèrdè e kaso.
Pero Kontrolaria no a keda kontentu ku e veredikto i a disidí di bai den apelashon, ya ku tabatin indikashon ku tin hasimentu di wega. Tin abogado di Kontrolaria e tempu ei ku konsientemente a keda sin presentá pa e kaso, miéntras ku ora ku Kontrolaria a disidí di apelá e kaso, a surgi hopi lobimentu di forma masha diskreto pa Kontrolaria distansia numa dje kaso. Tambe nos lektornan por kòrdá kon Kontrolaria tabata hopi rabiá ku su propio abogado. E malkontentu di Kontrolaria a keda manifestá i ekspresá den un karta ku por konsiderá komo un “brandbrief”, ku a bai tantu pa e abogado mes komo pa Minister di Asuntunan General. Kontrolaria ta haña ku e abogado tabata hopi negligente den e kaso aki pa kual tabatin tantu espektativa. Negligente pa motibu ku, no opstante el a prepará p’e kaso, tòg ora di presentá den korte el a bria pa su ousensia i laga un otro kolega abogado bai basha awa.
Kontrolaria a ser representá do di abogado mr. Van Rijn kende ta un eksperto riba Derecho Estatal, asesorá pa mr. Berti Braam, mientras ku UTS ta konta ku servisionan di mr. Kunneman, ku tambe a un eksperto rekonose.
Bron: Extra