WILLEMSTAD.— Fiskal van de Vliet ayera a demandá e kolombiano Gonzalo Tobar di 53 aña na 15 aña di prizòn. Tobar ta keda akusá pa asesinato di e dama kolombiana Luz Elena Rodriguez Rivas di 30 aña den kas di e akusado na Gato.
For di dia 13 di desèmber 2015 e kaso a tuma lugá. Na vários okashon e kaso a bin dilanti pero no por a keda tratá pa motibu ku e investigashon no tabata kla. Gonzalo Tobar ta keda akusá di a asesiná e dama ku un arma di kandela riba e dia ei den su kamber. Dia ku a detené Tobar, a hañ’é ku e arma di kandela den su kas. Su abogado Tjon Kaw Paw a duna di konos’é ku e dia ei su kliente tabata basta fuma di kual e la haña un black out.
Segun e abogado, su kliente ta sufri di un malesa ku e mester bebe remedi i ku si e brua esakinan ku alkohòl e por lag’é pèrdè konosementu i haña black out. E abogado ayera den su defensa manera el a hasi anteriormente, a para riba ku mester tin un di 3 persona involukrá den e kaso aki mirando ku a haña pikòp di su kliente habri miéntras esaki tabata sera.
Tambe e ta bisa ku e dama tabatin otro amante i tabatin problema kuné. Segun e abogado mirando ku a haña su kliente basta fuma i for di su konosementu, porta di outo habri, e ta duda ku ta su kliente a kometé e asesinato. Un testigu a deklará ku el a rekonos’é e akusado den e matutino “ Extra” na momento ku nan a deten’é. El a konta na
polis ku un dia promé, Tobar tabata na su kas. E dama tambe tabata tei i ta un konosí di dje. E dia ei nan a bebe 3 bòter di wiski . Mas aleu e testigu a bisa ku el a ripara ku tur djadumingu e akusado ta bin su kas pa motibu ku e tabata sa ku e Elena tei. Gonzalo tabata loko ku e figura di Elena. E dia ei nan tur dos tabata basta fuma. Gonzalo tabata purba mishi ku Elena kada bes i sunch’e pero Elena tabata rechas’e. Pa 5 or Elena a pidi Gonzalo pa bah’e na su trabou na Jansofat.
E testigu a bisa ku e mes kier a hiba Elena, pero Elena a pidi Gonzalo pa hib’e. Nan a bai drumi i a tende despues ku Elena nunka no a yega boka di trabou. Segun e testigu e ta kere ku Gonzalo a bai kas ku Elena pa viol’é mirando ku e tabata sa ku Elena ta fuma. Bisiña di e akusado a konta ku e dia ei el a yega fo’i trabou 9 ‘or di anochi. Gonzalo bou di yoramentu a yam’e bis’e ku tin un dama morto den su kas i e no sa kiko a pasa. Ora el a drenta el a mira e dama benta.
Direpente e akusado a bis’e pa e bai kas numa, i ku e mes lo resolvé e problema. Segun bisiña el a yama polis i keda ei nan te ora polis a presente. Bisiña a bisa mas aleu ku akusado tabata hopi fuma i tabata hole alkohòl. Momento ku polisnan a presentá nan a haña e dama drumi mei mei di un kamber barika abou i mitar sunú. Nan a haña rastro di sanger den serkania di e dama i tambe un kuchú ku spat di sanger. Tabatin basta kos benta abou i riba mesa mas ku 6 kuchú.
Outoridatnan a pensa ku e dama lo a forsagea ku e akusado pa evitá ku por e lo a viol’é. Den prinsipio e akusado a ninga di tabatin relashon seksual ku e dama, pero despues di a hasi un prueba di DNA, a bin haña spèrma di e akusado den e profundidat di e dama su vagina. Tobar ta para riba di no a kòrda kiko a pasa. El a deklará ku e tabata drumi i a tende un tiru.
Ora el a lanta el a mira e dama drumi abou. E dia ei su kasa tabata na Colombia. Ayera tambe el a keda ripití mesun kos. Su abogado a insistí ku ta un terser persona a tira e dama mata. Hues a bisa di ta bai pens’e i ta diktá sentensia dia 15 di mei binidero.
Bron: Extra