WILLEMSTAD. – Dos akusadó venezolano Carlos Sanchez i Esneider Paez a apelá nan kastigu, alegando ku nan no tabata sa ku e lancha ku nan tabata ariba, tabata transportando droga tambe.

Nan a keda arestá den un operashon di Warda Kosta den kombinashon ku Kuerpo Polisial i e dia ei a haña lote di kokaina, mariwana i tambe vários arma di kandela abordo di e lancha ku nan tabata ariba. Na total tabatin 7 aresto, di kua 5 venezolano i dos kurasoleño. E otro sinku personanan kondená no a apelá nan kastigu, pero Carlos i Esneider no por biba ku e echo ku nan tin un kastigu pa droga i arma siendo ku nan a subi e lancha pa yega Kòrsou ku e meta pa traha pa manda plaka pa nan famia na Venezuela i no tabata sa nada di droga.

Den korte di promé instansia dia 21 di sèptèmber di aña pasá Carlos i Esneider a keda kondená na 48 luna kastigu di prizòn.

Ayera den Korte di Apelashon e dos akusadonan aki a bolbe para duru ariba ku nan no tabata sa nada di droga, miéntras ku Abogado General a trese detayenan dilanti ku ta inkriminá e dos akusadonan aki den e transporte di 42 kilo di mariwana, 21 kilo di kokaina i tres arma di kandela, di kua dos revòlver marka Cobra kaliber .38 i un otro ku no tin marka. Un pistol Pietro Baretta kaliber 9mm i na total tabatin 13 bala den e armanan.

E loke ku e akusadonan no tabata sa ta ku polis tabatin e grupo aki na bista ya pa algun dia i tabata sigui nan kombersashon via di telefòn (tap) ku ta e arma di mas fuerte ku polis tin.

Esaki a pone ku polis tabata sa unda e droga ta keda bahá i na unda e outonan ta sali i stashoná warda droga yega.

Esaki a hasi e trabou di polisnan fásil, pa motibu ku ora e outonan tabata biniendo bèk for di e transakshon di droga for di área di lanthùis Sta. Martha, polis a blòkia nan i arestá tur hende.

Ayera abogado mr. Dickens a hiba un defensa amplio riba e partikularidat aki pa splika e tribunal ku e dos venezolanonan aki no tabata sa nada di kontrabanda di droga i arma. Ta hendenan ku a bin pa traha pa kria nan famia, nada mas.

E dos akusadonan na final di e kaso a bisa den nan último palabra ku nan ta spera ku e huesnan komprondé nan punto di bista i a pidi despensa pa e echo ku nan tabata ke a drenta Kòrsou di forma klandestino, pero tur kos tabata pa e trabou pa motibu ku na Venezuela situashon ta hopi malu.
Aki tres siman korte lo dikta sentensia.

Bron: Extra