WILLEMSTAD.- Ayera den e veredikto den e kaso di 289 kilo di koka mas 220 gram, hues a apsolvé e turko Kazim Alemdag di tur akusashon.

Esaki despues ku el a keda demandá na 5 aña di kastigu komo kómplise. Alemdag a keda detené huntu ku e kurasoleño Winklar i e otro hòmber turko Timucin dia 30 di òktober aña pasá den e kaso. Esaki despues ku e ko piloto Pulina a deklará ku Alemdag a pag’é un suma di 6 mil euro pa su servisio.

Alemdag a ninga esaki i a deklará, ku el a keda invitá pa Timucin pa bin keiru Kòrsou e ku su kasá. Un dia promé ku nan regresá bèk, el a haña tende ku e no por bai den e djèt pa motibu ku Timucin mester a transportá algun pasahero di Venezuela. Alemdag a bisa ku e ora ei e mester a kue un avion pa regresá su pais bèk ku su kasá. Abogado Vaders a bisa korte pa deklará Alemdag liber. Segun e abogado e loke ku e ko piloto Pulina a deklará di a haña sèn serka su kliente no ta kuadra.

Durante tratamentu di e kaso, e abogado a presentá un resibu di pago en konekshon ku e pago di e piloto firmá pa Timucin. Ayera den e veredikto hues a bisa ku apesar ku tin fuerte indikashon ku Alemdag por tin di aber den e transportashon, no tin sufisiente prueba kontra dje i nada ku ta sostené e deklarashon di e ko piloto. Hues a bisa di a tene kuenta ku e resibu ku e abogado a trese dilanti. Mirando esaki hues ta bai di akuerdo ku e abogado i ta deklará Alemdag kompletamente liber.

Bron: Extra

Kondena di 12 aña repartí den turko i yu’i Kòrsou pa…

WILLEMSTAD,–  Hues ayera a sentensiá e yu di Kòrsou  i un di e turkonan den e  kaso di 289 kilo di koka mas 220 gram ku a keda haña den un vèn blanku riba tereno di aeropuerto dia 30 di òktober 2016. E akusado yu di tera Elton Winklar ta keda kondená na un kastigu di 6 aña, miéntras su ko-akusado turko Metin Timucin tambe ta keda kondená na 6 aña.   E droga tabata destiná pa wòrdu pone riba un djèt priva ku tabata para riba pista kla pa sali pa Istanbul.  Den e vèn polisnan a haña  arma di kandela, hanskun, munishon, skèr di kòrta waya i máskara.

Despues di investigashon a sali na kla ku dia 22 di òktober  e mesun modèl di transportashon a  keda hasi. E biaha aki pa e pais Canada via di un djèt priva. Outoridatnan kanades a interseptá mesun paketenan ku e mesun logonan ku tambe a keda pone riba un djèt priva. Despues ku a bai wak e imágennan a bin mira ku ta e mesun vèn blanku a keda uza, mesun ora, mesun lokashon via mesun sistema. E akusado yu di Kòrsou Winklar ku tabata traha na Swissport a konta ku e tabata na Campo ora ku e ku un hòmber deskonosí a kuminsá kombersá kuné riba vários tópiko. Den esaki el a bisa e deskonosí  ku e ta traha na e kompania menshoná.

Mesora e hòmber a pidié pa kompañá nan  hiba algun maleta  di plaka na avion i ku e lo ser rekompensa pa esaki. Nan a pasa busk’e na Mirado pa bai ku nan.  Seguridat di e kompania di karga a tuma nota di algun moveshon straño e dia ei i a yama polis mesora. Polis ta haña Winklar den porta di e vèn i a mira un hòmber skondí tras di e maletanan. E hòmber a resultá di tabata Timucin ku tabatin e yabinan di e avioneta den su saku. Polisnan a deskubrí e merkansia den e maletanan. Timucin a duna vários deklarashon i a bisa entre otro  ku e avion no ta dje i ku ta plaka venezolano nan a  bisé ku e lo mester bai transportá.

Segun e akusado un tal Calam  a page 130 mil dòler pa transportá e tasnan pero e no a paga tinu kiko tabatin den nan. Fiskal  a bisa ku e no ta kere nada di loke e akusadonan a deklará. Hues a bisa Winklar ku e ta tum’e hopi na malu, pa motibu ku e sa ku e orario ei, e portanan ta sera i ku e loke e kier a hasi e sa ku ta kontra lei. Sea hiba sèn, hende òf otro kosnan na avion di un manera ku no ta e prosedura normal, ta kastigabel pa lei.

Ayera den e veredikto, hues a bisa ku  e akusado Timucin  tabata bon na altura kiko e tabata bezig kuné i a probechá di e oportunidat pa purba hiba e maletanan ku droga avion mei anochi. Hues ta haña esaki sufisientemente probá i ta kondená Metin Timucin na 6 aña. Hues a haña e akusado yu’i Kòrsou Elton Winklar kulpabel mirando ku el a hasi mal uzo di su trabou i tabata kómplise pa e transportashon grandi di koka. Mirando esakinan hues ta kondená Winklar tambe na  6 aña. Tantu e djèt priva i telefònnan a keda konfiská.

Bron: Extra