WILLEMSTAD.- Prizòn di Kòrsou, manera e ta strukturá aktualmente no ta bale la pena pa hinka 47 mion den dje. E manera kon prizòn ta ser operá no ta yuda ku nada na resosialisashon dje prezu, miéntras ku e ta un instituto pa korupshon tuma lugá.
Asina e lider polítiko di Kòrsou di Nos Tur, sr. Amparo dos Santos, a deklará ayera tardi durante un konferensia di prensa. T’asina ku resientemente dirigentenan di e partido a bishita e Sentro di Detenshon i Korekshon Kòrsou (SDKK) kaminda nan a tuma nota di e situashon den kual prezunan ta detené. Segun dos Santos, e por konsiderá esaki komo un momentu hopi duru pa nan a bishita e lugá, i esaki ta algu ku a hasi hopi impakto riba su persona i demas miembronan, pues el a sinti su mes obligá di vosiferá e preokupashon ku ta biba ei den. E situashon bou di kual nos kompatriotanan a será ta hopi inhumano.
Pero komo parti di e bishita nan a hiba kombersashon ku e direktor di SDKK, sr. Urny Floran, kende alabes a duna nan un rekorido den e kompleho.
Segun sr. Dos Santos, durante su estadia den prizòn a surgi e punto di presupuesto dje instituto, i el a bin komprondé ku te ku algun aña pasá SDKK tabata konta ku 47 mion florin pa kubri gastunan di prizòn. Sinembargo awor a bah’e na 42 mion. Mas aleu el a komprondé ku tin alrededor di 372 persona detené, di kual un 30 estranhero. SDKK ta konta tambe ku alrededor di 350 empleado.
Segun dos Santos, for di su brel komo komersiante el a yega masha lihé na e konklushon ku ta tiramentu di plaka afó tin ku operashon di prizòn den e forma ku e ta akualmente. Pasobra for di e 47 mion lo por bai den barionan i hasi algu na prevenshon ku e plaka. Lo por krea trabou pa un grupo grandi di hóben i paga nan fl. 2.000.- pa luna. Si hasi esaki ku 300 hóben so kaba lo kosta 600 mil florin pa luna, i multipliká ta yega na 7.2 mion pa aña. For di e punto di bista di prevenshon asta lo por opta pa paga un grupo tanten nan ta sperando pa hinka nan den e mulina di trabou.
Si reserva 20 mion mes pa kubri gastunan di personal, ainda a keda kasi 20 mion florin.
Den e situashon aktual gobièrnu ta splika ku kada prezu ta kosta komo fl. 300.- pa kabes pa dia, ku ta fl. 9.000.- pa luna. Si ke hasi algu na prevenshon, lo por usa e plaka ei pa evitá ku hóbennan ta kometé atrako i otro fechorianan. Nan ta hasié aktualmente pasobra nan no tin trabou i nan ta kai den krímen.
Bron: Extra
Un bon punto, ta prefera finansia un instituto pa sera hende den dje ku a inberti den kuponan di trabou. Pa spar gastu lo por ekstradita e estranheronan pa nan kumpli nan kastigu na nan Pais di origen i dimes ku prohibishon pa drenta Kòrsou bek o pa un periodo stipula. Pero esaki ta e kaso kaba foi tempu a profera hinka 100 mion den añanan 2000 na Koraal Specht/Bon Futuro/SDKK pa drecha esaki, pero parse no ta tin tambe un 100 mion pa hinka den kupo di trabou i edukashon! Kuantu sen por ehempel un UoC, FEFFIK etc. ta hanja en komparashon? Kon por ta hinkado tantu mionesnan den un prison pero pa edukashon un minimo?