Dilanti e wes den e huisio sumario e ofisina ulandes a deklará ku awor e ta dispuesto tòg pa koperá pa SONA haña e informashon ku e mester pa por formulá e kuentanan anual konsekutivo.
Den e huisio sumario di djaweps e wes a mara kondishon na e palabrashonnan ku el hasi ku e dos partidonan. Por ehèmpel kada un di e dos partidonan por apuntá nan akountent ku huntu ku e akountent di SOAB lo atendé ku e atministrashon ku ta nesesario. Si tin diferensia di opinion, e akountent di SOAB tin e bos desisivo. Ambos partido a bai di akuerdo ku esaki i pa e wes asina e huisio sumario a kaba tambe.
Tur dos partido a kumbiní pa finalisá traspaso di e atministrashon promé ku fin di e luna aki. Despues SONA por tuma riba dje pa finalisá e kuentanan anual di 2014, 2015 i 2016, manera gobièrnu a pidi, ku ta esun ku a duna e enkargo pa e proyekto di hospital.
Pa no stroba e prosedimentu aki, partidonan a kumbiní tambe pa durante luna di sèptèmber nan no akudí na otro medidanan hurídiko. Por lo demas, wes a stipulá ku tur dos partido ta liber pa tuma pasonan hurídiko despues, tambe pasobra e abogado di SONA a anunsiá kaba durante tratamentu di e huisio sumario ku e ta preparando un prosedimentu legal a fondo kontra Berenschot pa kobra bèk un suma di miónes.
Bron: Extra