WILLEMSTAD.- Aubert Wiels, ruman di Helmin Wiels a bisa na final di tratamentu di e “reggiezitting” di kaso Maximus, ku el a keda tur bruá i turdí. Ayera a kontinuá ku tratamentu di e “reggiezitting” di kaso Maximus ku ta e intelektualnan ku a paga pa mata e lider di Pueblo Soberano, Helmin Wiels dia 5 mei 2013.

Na final di tratamentu di e kaso, a disidí pa posponé esaki pa tempu indefiní, debí ku ainda mester tende algun testigu.

Presente ayera den sala di korte ta ruman di Helmin, Aubert Wiels, kende a bisa EXTRA despues di a sali e kaso, el a keda tur bruá i turdí. “Mi ta ‘bezig’ pa wak kiko por hasi pa trese kambio. Mi no sa si OM ta inkompetente di no por solushoná e kaso. E kos aki ta hasi hopi doló. Un kaso den ekspektativa i ku tabata kasi kla pa aresto kuminsá kai, awor ta parse di ta mas leu”, Wiels a bisa.

P’esei e pregunta ta surgi kiko ta pasando. Kiko por hasi i komo famia, segun Aubert Wiels. E ta sinti ku nan man ta mará dor sistema di hustisia.

Aubert a indiká ku e por pidi pa papia ku e fiskal mayó, pero nan no sa kiko e por bisa nan.

“Awor nos ta wak si ta buska un investigadó merikano pa bin yuda nos ku investigashon. Pero einan mes no sa si OM ta tuma esaki”. Aubert a bisa: “Nan a tira algun polis den algun siman a kue e kulpabelnan, meskos e kaso di Hato-shooting, nan a tira dos mucha den wikènt i sa kaba ta ken i ta buskanan, na Bonaire a manda tur kos pa solushoná e kaso di e agente polisial. Ta dikon di mi ruman ainda nada, i despues di tres aña no por kue esnan ku a laga mat’é”. Sea OM ta inkompetente òf nan no tin interes, i ta laga e kaso bai muri òf pasó nan mes no tabatin gana pa Helmin taba’tei. Un ‘gevoel’ masha malu. Otro siman lo pidi fiskal pa un kombersashon, Aubert Wiels a terminá bisando EXTRA.

Bron: Extra