WILLEMSTAD.- ‘ Nos a entregá un apelashon kontra e desishon di minister di Tráfiko, Transporte i Planifikashon Urbano ( VVRP), Suzy Camelia-Römer pa no otorgá AVA Airways e pèrmitnan ekonómiko, ku AVA a pidi.
For di 30 desèmber di aña pasá nos a entregá un petishon na e minister en kuestion. Ku e petishon nos a puntra minister pa otorgá nos diferente dokumento. E tin di aber ku dokumentonan ku ta pretendé ku Camelia- Römer a usa pa yega na ningamentu di petishon di AVA Airways. Ta trata di diferente konseho di SOAB.”
Asina abogado Chester Peterson a splika ayera. Segun Peterson tin dokumentashon ku SOAB ta konfirmá ku no tin nada ku ta stroba e minister pa otorgá e pèrmitnan en kuestion. Tim di AVA Airways ke kopia di esei. Tambe Peterson a splika ku direktor di Outoridat di Aviashon, Oscar Derby. Tabatin motibu personal pa konsehá negativo riba petishon di AVA Airways. ‘Nos tambe a pidi e supuesto konseho ku minister Suzy Camelia-Römer a usa di presidente di Banko Sentral di Kòrsou i Sint Maarten Emsley Tromp.”
Peterson: ‘Minister Suzy Camelia-Römer tambe ta pretendé ku e tin un rapòrt forensiko, ku AVA Airways a entregá papelnan falsu. Nos ta wardando kasi un aña. Nos no a haña ningun dokumentashon ku nos a pidi.
Minister ta pretendé ku e ta hopi transparente, pero te ainda nos no a haña ningun kontesta.”
Bron: Extra