WILLEMSTAD. – Tur kos ta indiká ku e dil ta kla, sr. Carl Camelia lo a haña un suma di 4.7 mion florin pa start ku un skol di polis riba nivel universitario (Bachelor).
Esaki ta pone ku awe 4’or di atardi sr. Ronaldo Abrahamsz tin un reunion ku Minister di Hustisia sr. Nelson Navarro pa sa kiko ta bèrdat di esaki. Manera ta konosí den un a di mei di e aña aki, e sindikato NAPB i ABVO a bati alarma riba un loke ku nan ta yama deroche di plaka.
A laga sr. Carl Camelia a traha un rapòrt devastador di e aktual internat di polis i e mesun hende aki lo tin un skol di polis di nivel haltu pendiente pa start kuné.
E rapòrt a kosta 300 mil florin un rapòrt ku na opinion di NAPB i ABVO e tempu ei ta konsiderá komo un rapòrt bashí ku no ta bisa nada. Segun e sindikatonan NABP i ABVO, e kalidat di hendenan ku ta traha na skol di polis ta tòp, ta internat no tin, pa motibu ku nunka Minister no a laga drecha e internat, pero ta paga 300 mil florin pa un rapòrt ku no ta bisa nada, na sr. Carl Camelia. Ironia ta ku den e rapòrt Camelia, ta mustra riba importansia pa tin un internat, na skol di polis, pero ta parse ku Camelia no sa ku ta gobièrnu no a drecha e internat.
Na opinion di ABVO, t’asina ku e 300 mil florin ku a paga Camelia pa e rapòrt, hopi kos por a hasi ku e sèn pa e internat di polis.
Abrahamsz a duna di konosé ku el a tende ku Konseho di Minister a pasa e dil i p’esei e ta awe serka Minister di Hustisia pa e keda informá di e desaroyo.
Bron: Extra
