WILLEMSTAD. – Manera ku Extra a publiká anteriormente kaba, awe korte ta trata e petishon ku eks Minister di Finansa George Jamaloodin a entregá na Hues Komisario pa sera su kaso den e investigashon Maximus.

E petishon ta hasí pa motibu ku e investigashon ta dura muchu largu, loke ku ta stroba Jamaloodin den su bida diario i tambe si e kaso no yega na un fin, su chèns pa e bira minister di finansa despues di elekshon na kaminda ta nihil.

Ta trata di un petishon konforme e artíkulo 56 di Kódigo Prosedura Penal, pa Hues Komisario, obligá Ministerio Públiko pone un fin na e investigashon den su kontra den kaso Maximus.

Jamaloodin ta konsiderando e posibilidat pa e bolbe okupá e kartera di Minister di Finansa si e keda aserká pa e gobièrnu nobo ku sinta.

Manera e situashon ta awor aki ta hasi e okupashon manera esaki imposibel.

Su status komo sospechoso den e kaso konosí komo kaso Maximus, kaminda ku Ministerio Públiko ta investigando e outornan intelektual di asesinato di Lider di Frakshon di Partido Pueblo Soberano Sr. Helmin Wiels, ta strobando Jamaloodin su funshonamentu den e bida diario.

E kaso ta keda tratá awe, pa motibu ku meta ta ku mester haña klaridat promé ku dia 30 di sèptèmber dia di elekshon, di manera ku por konsiderá su persona komo kandidatura pa Minister di Fiansa atrobe.

Jamaloodin ta di opinion ku su periodo komo Minister di Finansa el a logra muchu mas tantu ku tur su antesesornan. P’esei e ta kere ku su karchi di kastigu mester keda blanku pa por e konsiderá su posishon atrobe komo Minister.

Awe e kaso ta keda tratá, pero ku porta será.

Bron: Extra