WILLEMSTAD,- Awe mainta ta planiá ‘regiezitting’ di kaso di apelashon di Gerrit Schotte i su partner Cicely van der Dijs. E pareha lo presentá ku abogado ulandes mr. Geert-Jan Knoops i su tim.

E regiezitting ta un promé paso promé ku tratamentu ku kontenido. E kaso ta programá pa kuminsá 9’or di mainta. Manera konosí ta trata di e kaso Babel den kual Schotte i Van der Dijs a apelá nan sentensia di dia 11 di mart 2016.

Dia 11 di mart último hues a haña probá falsifikashon di dokumento, labamentu di plaka, den poseshon di “jammers” ( aparato pa stroba frekuensia di telefonia), gaña ku el a pèrdè su pasport diplomátiko i a hasi uso tambe di e pasport diplomátiko, tur esakinan ta forma parti di e pruebanan ku hues a konstatá.

Esaki a kondusí na kondena di 3 aña prizòn pa Gerrit Schotte i 18 luna di kua 9 luna kondishonal pa CicelyvanderDijsi3aña di prueba. Pa Schotte, hues a bai tambe di akuerdo ku e petishon di Ministerio Públiko pa durante 5 aña ku e no por postulá su mes eligibel pa parlamento.

Den korte di promé instansia, pareha Schotte i Van der Dijs a keda defendé pa mr. Sulvaran. Pero awor den apelashon nan tin abogado ulandes mr. Knoops ku lo traha bou dje bufete di mr. Vaders. Mr. Knoops tabata defensor di polítikonan Booi i Elhage na Bonaire i kual kaso nan a keda apsolvé di dje, i tambe den kaso Spelonk, unda a logra probá inosensia di dos akusado.

Segun abogado Geert- Jan Knoops tim di defensa di Gerrit Schotte den kaso Babel a kuminsá ku investigashon nobo. Knoops a splika resientemente: ‘Mi mester bisa ku nos a deskubrí hopi echonan nobo. Ku esaki e chèns ta hopi grandi ku wes den kaso di apelashon lo bin ku un otro desishon, kompará ku e sentensia di algun luna pasá’.

Bron: Extra