WILLEMSTAD,- Awe mainta informadó Kenneth Gijsbertha lo informá partidonan ku a deliberá último dianan tokante un koalishon nobo, ku su konklushonnan’, asina EXTRA por komprendé for di diferente persona konserní.

Tim di negoshadó di partidonan MAN, PAR, PNP i Pueblo Soberano resientemente a reuní diferente biaha tokante koalishon nobo. Esaki ta basá riba e akuerdo di disponibilidat ku e partido a firma 10 di òktober. ’Djaluna mainta nos lo sinta huntu i nos lo tende for di informadó Gijsbertha kiko ta su konklushonnan i kiko e lo informá gobernador Lucille George-Wout’, asina un hende enbolbí a splika EXTRA ayera.

Punto kardinal ta kiko lo tuma lugá ku partidonan Un Kòrsou Hustu (UKH) di Omayra Leeflang i Movementu Progresivo (MP) di Marilyn Moses. Gijsbertha, segun fuentenan, a deliberá ku representantenan di partido MAN, PAR, PNP i Pueblo Soberano na un banda, i na otro banda ku partidonan Un Kòrsou Hustu i Movementu Progesivo. Manera ta konosí partido MAN ta di opinion ku ta bon pa lo haña un gobernashon ku por konta riba sosten di 14 asiento.

Esaki ta nifiká ku partidonan UKH i MP ta forma parti di gobernashon nobo.

‘Djaluna nos lo tende kiko ta e konklushonnan di informador tokante e posibilidat pa forma un gobièrnu ku 4 òf mas partido.’

Manera ta konosí partidonan MAN, PAR, PNP I PS a firma un akuerdo di disponibilidat kaminda nan ta bisa ku nan ta dispuesto pa traha ku otro den un gobièrnu 2016- 2020.

Den e dokumento ku e partidonan a firma ta un pasashi pone, ku ta bisa ku nan ta habri pa e posibilidat pa e gobièrnu wòrdu amplia.

Bron: Extra