WILLEMSTAD. – Riba ròl penal di djárason awor, tin dos petishon di Banko Sentral pa keda tratá. Ta trata di artíkulonan 43 i 150 di Kódigo di Prosedura Penal.
Artíkulo 43 ta un huisio sumario penal pa atendé aspektonan ku no ta reglá den lei, miéntras artíkulo 150 ta pa haña kosnan tumá den beslag bèk.
Manera ta konosí, despues ku a start investigashon penal kontra di Presidente Direktor di Banko Sentral, Emsley Tromp, e tim ku tin e investigashon na nan enkargo a bai tambe na Banko Sentral i a tuma kosnan den beslag einan.
Pa drenta Banko Sentral no tabata fásil, pero outoridatnan a buska e kanalnan legal pa tòg drenta den e banko.
Manera ya menshoná a tuma sierto kosnan den beslag i esaki ta motibu ku Banko Sentral pa medio di artíkulo 150 ta pidi e kosnan tumá den beslag bèk.
Banda di esei tin un otro aspekto ku ta hunga un ròl ta e koperashon ku Banko Sentral mester duna pa e investigashon por kana, pero parse ku esei no ta kanando manera mester ta.
Pa medio di artíkulo 43, por atendé aspektonan ku no ta reglá den lei.
EXTRA a komprondé ku akinan lo pidi Korte pa obligá Ministerio Públiko para e investigashon ku ta tuma lugá den e banko. Pues no e investigashon kontra di Tromp.
Banko ke pa husga tambe, e entrada hudisial resien na e banko nulo.
Esaki ta e dos petishonnan ku por sierto ta riba mesa, esaki konforme di fuentenan hopi yegá ku e kaso.
Tin indikashon ku e kaso lo no kontinuá, pa motibu ku Banko Sentral ta pensando di hala e petishonnan aden.
Bron: Extra
Ayera: LANDSRECHERCHE TABATA DRENTA SALI BANKO SENTRAL
WILLEMSTAD. – Ayera funshonarionan di Landsrecherche tabata drenta sali Banko Sentral.
Tabatin e informe ta sirkulá ku Emsley Tromp lo mester a presentá ayera na ofisina di Landsrecherche pa keda interoga. E informe aki no por a keda konfirmá pa niun outoridat, pero e loke ku si por a opservá ta ku funshonarionan di Landsrecherche tabata hopi okupá ku drenta sali den e banko.
Mester indiká ku tin un silensio hermetiko den e kaso aki i niun instansia no ke papia. Ministerio Públiko ta limitá nan mes i no ta duna informashon i korte tambe ta keda te na splikashon di lei sin bai den detaye di e kaso.
Manera ta konosí ku e ofisina di Landsrecherche ta nèt dilanti di Banko Sentral, loke ku ta hasi e trabou di e funshonario aki fásil, pa motibu ku nan ta djis krusa kaya i yega na nan punto di investigashon.
Esaki tabata tuma lugá tambe i por a opservá kuantu biaha e dos funshonarionan aki tabata bai edifisio di Banko Sentral i regresá nan ofisina.
…Riba e kombinashon di foto por mira dos di e funshonarionan di Landsrecherche ta sali na ofisina di pia i krusa kaya bai Banko Sentral… Miéntras Banko Sentral mes a entamá dos huisio sumario penal un pa nan haña nan kosnan bèk ku a keda tumá den beslag i e otro ta pa stòp e investigashon den e banko.
Bron: Extra