WILLEMSTAD.- SONA no ta haña rekomendabel pa diskutí ku e minister di GMN tokante e hospital nobo pa Kòrsou atraves di medionan di komunikashon.
P’esei mes SONA dia 4 di ougùstùs 2017 a manda su propio puntonan di doló direktamente pa konseho di minister den un karta ku te dia djawe a keda konfidensial i no a sali den prensa. Sinembargo, for di e momento minister di GMN Suzy Camelia-Römer – direktamente i atraves di prensa – a ekspresá akusashonnan asina fuerte, SONA no por keda sin reakshoná mas. Sperando ku por disminuí e diskushon aki, SONA lo limitá su mes awor aki na algun punto básiko.
Responsabilisashon
E ministernan di GMN i di finansa ta tene SONA komo partner di kontrato responsabel pa duna kuenta i rason di e finansa pa konstrukshon di e hospital nobo. Esei ta kuadra i no ta punto di diskushon. Ta un lástima si ku e ministernan ta neglishá kompletamente ku e empresa Berenschot, ku te fin di desèmber 2016 tabata enkargá ku ehekushon di e proyekto HNO, tin e atministrashon finansiero wantá deliberadamente. Ta inkomprensibel tambe ku Berenschot a firma un akuerdo di prinsipio ku SONA pa traspasá e atministrashon finansiero pa SONA, pero el a pone esaki ‘on hold’ despues ku e supervisor ministerial di e minister di GMN a bai kòmbersá ku Berenschot. Den un mail Berenschot mes a referí na e kòmbersashon ku e supervisor ministerial komo motibu pa violá e akuerdo di prinsipio i pa sigui sekuestrá e atministrashon di SONA. Awor ta deklará ku SONA no ta kumpliendo, pasobra e partner di kòmbersashon di e supervisor di HNO, esta Berenschot, tin e asuntu blòkiá. E desaroyo aki no ta kuadra ku e gran balor ku e ministernan di GMN i di finansa korektamente ta mara na un responsabilisashon finansiero kompleto.
Pasobra, semper a tene gobièrnu regularmente na altura di progreso di e proyekto i di e fasetanan finansiero, entre otro den relatonan finansiero mensual (atministrá te i ku yüni 2017) i relatonan di kuartal (bei te i ku e promé kuartal di 2017). Pa e relatonan anual e akountent eksterno ta eksigí e dokumentonan pa supstansiá un ke otro, ku ta hustamente esnan ku Berenschot tin prezu. Na momento ku nan bin disponibel, SONA por finalisá e relatonan anual, pasobra ya a prepará p’e.
Bron: Extra