WILLEMSTAD.- Banko di Seguro Sosial ta hasiendo tur esfuerso pa pone fin na un situashon tristu ku a surgi na Colombia ku un pashènt yu di Kòrsou ku nan a manda Colombia i ku a fayesé.
Medicina Legal, un outoridat ku ta atendé ku tur kaso di fatalidat den mundu di medisina i kuido a pone beslag riba e restunan pa motibu ku tabata trata di un kaso kaminda e pashènt a yega Colombia ku heridanan serio ku el a sufri den un aksidente aki na Kòrsou.
E kaso a kuminsá na òktober ora mester a manda e pashènt Colombia mirando su kondishon delikado kousá pa e aksidente ku el a sufri. E hòmber no tabatin pasport i mester a laga traha un dokumento di emergensia, un lassez passer ku kua a hiba e pashènt Colombia den buelo ambulans. Personal dje hospital kaminda a hiba e pashènt kumpliendo ku leinan kolombiano a notifiká Medicina Legal dje kaso, esta ku nan tin pashènt ku a muri a konsekuensia di heridanan ku el a sufri den un aksidente. E entidat kolombiano mesora a embargá e kurpa sin bida. Famianan dje defuntu a trata di atendé e asuntu aki na Colombia pero no a logra.
Outoridatnan kolombiano a eksigí un subrina dje defuntu pa hasi un tèst di DNA pa establesé ku e ta famia promé ku nan entrega e restunan. E tèst di DNA a produsí un mismatch loke a hasi e kaso mas difísil. SVB a pidi asistensia di embahada di reino na Bogota pa mira kon por atendé e asuntu i logra ku ta lanta e beslag riba e restunan di moda ku por trese e defuntu Kòrsou pa un entiero digno.
E embolbimentu di embahada tampoko a duna resultado deseá i awor ta tratando pa mira si outoridatnan kolombiano por manda un òf mas hende Kòrsou pa bin hasi e tèstnan di DNA riba otro famianan dje defuntu. No a haña kontesta ainda riba e proposishon aki Philip Martis, direktor di SVB a indiká
Bron: Extra