WILLEMSTAD.- ‘Partido PAR a bai elekshon ku un programa ku salubridat hopi bon, hopi balansá. Mi a kampañá p’e. Mi a kere den dje. Ora mi a komprendé e wikènt aki ku PAR tin e kartera di Salubridat, outomátikamente mi a asumí ku e kartera lo bin serka mi, i mi lo bira minister di Salubridat.

Pero despues lider di partido Zita Jesus-Leito a manda un app na diferente hende den partido pa splika ku e lo bira minister di Salubridat pa e partido. Na e momentu ei ta bira kompletamente kla pa mi ku partido no tin konfiansa den mi. Ni komo presidente, ni komo parlamentario, ni komo posibel minister. Semper nan ta keda tene mi afó.”

Asina Eduard Braam a splika. Braam te ayera tabata presidente di PAR i komo number 4 riba lista di partido, keda huramentá siman pasá komo parlamentario pa e partido. Ayera mainta Braam a entregá su retiro ku miembro di PAR i a duna di konosé ku e ta sigui su trabou komo parlamentario independiente. Braam ayera mainta a laga un persona ku nòmber di Lio entregá karta ku su desishon na palasio di Gobernador.

…Ayera mainta e persona ku nòmber “Lio” a entregá karta di Eduard Braam na gobernador Lucille George- Wout… Despues Braam a splika ku el a papia ku lider di partido PAR, ku ta Zita Jesus-Leito, e wikènt aki ku mas ku un ora na telefòn. Braam tabata pafó durante e wikènt pasá. Durante e kombersashon ku Jesus- Leito Braam a splika ku e ta desapuntá ku diferente kos ku ta pasando den e partido.

Djadumingu anochi Braam a yega bèk Kòrsou. Durante e wikènt partidonan MAN, PAR, PNP i Un Kòrsou Hustu a yega na un akuerdo pa firma un akuerdo di disponibilidat pa un gobièrnu nobo. Djaluna mainta 10 persona a firma kaba, pero firma di Braam so tabata falta. En bes di firma, Braam a entregá karta na gobernador i presidente di Parlamento pa e bira miembro independiente.

Bron: Extra