WILLEMSTAD.- Hopi hende den pueblo ta di akuerdo kon el a bin ta atendé henter e asuntu di Planifikashon Urbano i prinsipalmente eradikashon di aktividatnan ilegal.
Amigu i enemigu tin di rekonosé ku sra. Suzy Camelia-Römer a bin ta hasi un bon trabou, i komo tal lo ke mir’é kontinuá ku e trabounan, aunke ofisialmente e mes ta preferá di no asumí ningun posishon.
T’asina ku den e fin di siman ku a pasa tabatin desaroyonan interesante pa loke ta formashon di un gobièrnu nobo pa Kòrsou. E notisia prinsipal tabata ku Pueblo Soberano ya no ta parti di e negosiashonnan, i di otro banda ku “Un Kòrsou Hustu” di sra. Omayra Leeflang a tuma e desishon pa djòin partidonan MAN, PAR i PNP pa forma un gobièrnu ku un base smal di 11 asiento.
Mester bisa ku e mesun rosea e repartishon di karteranan a bira konosí, miéntras ku nòmbernan pa okupá e puestonan tambe a kuminsá skeiru. Pa loke ta Partido Nashonal di Pueblo e nòmber di e propio lider polítiko sr. Humphrey Davelaar a kai relatá na e kartera di VVRP, loke a kousa un tiki strañesa. Strañesa pa motibu ku, si esei ta bèrdat PNP lo bai kontra e prinsipio di “never change a winning horse”.
EXTRA a hiba un kombersashon breve ku Camelia- Römer i el a preferá di no asumí ningun posishon, ya ku asignashon di funshonnan ministerial ta algu ku a direktiva di partido ta disidí ariba. “Ta partido ta disidí si mi ta bin bèk”. El a pidi pa keda trankil, ya ku den polítika tin di sigui e pasonan manera deliniá. Nada no ta imposibel pero no t’e ta disidí. No tabatin ningun aserkamentu di su persona tampoko.
Mester bisa ku den un entrevista na televishon, sr. Davelaar tambe a bisa ku un desishon manera esei ta algu ku ta direktiva ta disidí.
Camelia-Römer a hasi un bon trabou den e tiki tempu ku el a haña pa remplasá Earl Balborda komo titular di VVRP. E ta konosí komo un persona di ‘no nònsèns’ i ta gosa di simpatia pa e aserkamentu pa ku konstrukshonnan ilegal. A tuma un desishon ku ta pone un paro definitivo na okupashonnan ilegal, bou dje kondishon ku esnan kulpabel ta presentá pa hasi e trámitenan di legalisashon. Na mes momentu a kuminsá ku e proseso pa saka terenonan kla pa konstrukshon, pero tambe proyektonan di konstrukshon di kas di pueblo den koperashon ku sektor privá.
Tin hopi proyekto públiko manera trahamentu di rotònde i asfaltamentu di kaminda ku a tuma lugá i ta den ehekushon.
Bron: Extra