WILLEMSTAD,- Segun Charles Cooper e entrada hudisial den su kas di awe mainta ta un show polítiko. ‘E ta un otro ehèmpel ku nos sistema hudisial ta unu di pèst di dje.’

Segun Cooper ‘mas lihé posibel mester bin un enkuesta parlamentario tokante henter kadena hudisial. Di kon? Awe mainta nan a hasi un entrada den mi kas na Mamayaweg. Pero nan no por a bisa net net nada basá kiko a hasi e entrada hudisial. Nan a bisa omkoping. Pero di ken i di kiko? Nan no por bisa. E echo ku awor mi ta sali mi kas pa papia ku prensa komo hòmber liber ta e prueba ku no tin ningun prueba.’

Segun Cooper: ‘Ta un set di piskadó makamba ku koperashon di un par di bomba yu di Kòrsou ku ta hasi esaki. Nan ke mancha mi nòmber i otro partidonan den kuadra di elekshon.’

Cooper a deklará ku e ta ‘masha trankil’. Segun Cooper durante entrada hudisial ‘nan a bai ku sèn di mi kasa su negoshi. Pero nan no a bai ku faktura di e negoshi di mi kasa. Nan a puntra pakiko nos tin asina hopi sèn kèsh den kas. E negoshi di mi kasa ta un negoshi ku ta drai hopi bon. Tin kliente ku ta swipe, pero tin hende ku ta paga kèsh tambe.’

Segun Cooper no tin niun prueba ku e ta enbolbí den kaso di posibel soborno. ‘No tin prueba. Tur kos ta ku nan a tende algu via via. Esaki ta nan modus operandi. Nan ke mancha e nòmbernan di mi, MFK ets. Pero mi ke bisa un kos si: ‘Wak bon kon bo ta bai voto 28 aprel’. E makambanan a duna gobernador e oportunidat pa posponé elekshon. Si gobernador lo skùif e fecha, mi lo puntra e pueblo pa bai manifestá masalmente kontra esaki. Awor e ta bon pa PAR i MAN i tur e otro pa e makambanan a duna gobernador e oportunidat. Tin indikashon fuerte, ku gobernador lo kambia e fecha. Pero mi ke bisa ku makambanan no por sigui manda riba e pais aki.’ Cooper a kuminsá un kaso kontra proseso di screening tokante su persona, ku te ainda no ta kla. ‘Nunka nan no a bisa kiko a pasando. Pero awor esaki a bia hopi opvio. Nan ke mancha mi nòmber ku e kaso ei.’

Bron: Extra