WILLEMSTAD,- Charles Cooper lo partisipá den elekshon di 28 Aprel 2017. Si nan ta bai dor. Asina Cooper ta konfirmá pa EXTRA. ‘Te ainda tin dos partido ku a aserká mi persona, ku ta MFK i Kòrsou di Nos Tur.

Te ainda mi no a tuma un desishon riba kua lista mi lo subi.’

Cooper: ‘Manera ta konosí Movementu PAS a disidí pa no partisipá den e elekshon benidero. E partido no tin sufisiente sèn i riba término kòrtiku no tin sufisiente hende ku por subi lista.’ Cooper a splika ku despues ku e desishon pa no partisipá a kai, tin dos partido ku a aserká su persona: MFK i Kòrsou di Nos Tur. ‘Mi no a tuma desishon te ainda, pero mi lo partisipá den elekshon.’ Banda di esei Cooper a konfirmá ku tambe Gregory ‘Chayenne’ Gonzalez di Movementu PAS a keda aserká dor otro partidonan pa subi riba lista. Gonzalez lo tuma desishon awe tambe. Ta bisa ku e konosido polis i bosero di AMAK lo subi lista di MFK, pero esaki no ta konfirmá.

Cooper a splika ku dos otro miembro di Movementu PAS, ku ta Vanessa Eliza i Urwin Macaay, a keda aserká pa subi riba lista di otro partido. Pero nan a disidí pa no partisipá den e elekshon benidero.

Manera ta konosí Charles Cooper a bandoná partido MAN aña pasá despues ku un konflikto entre su persona i e partido tokante nombramentu di un presidente nobo. Segun Cooper e kandidato mihó tabata Urvin Macaay; pero partido a skohe Etienne Wallé. Despues ku Cooper a sali MAN, el a lanta Movementu PAS i partisipá den elekshon di 2016. Partido a haña 3452 voto, ku no tabata sufisiente voto pa un asiento. Cooper su persona a haña 1869 voto. Gonzalez (komo number 5 riba lista) a haña 197 voto.

Bron: Extra