WILLEMSTAD.- E ‘claim’ di InselAir na Venezuela ta real. Riba ‘site’ di CADIVI por mir’é ta loke ku sr. Andre Delger (CFO InselAir) a duna di konosé ayera den parlamento.

Parlamentario Sherwin Leonora a pidi si por a mira dokumentonan ku ta papia dje suma di 100 mion florin di benta di ticket di InselAir ku ta pegá na Venezuela.

Sr. Delger a indiká ku ora subi ‘site’ di CADIVI por mira esaki. Alabes a bisa di lo manda e imágen dje debe na CADIVI pa parlamento. Den e plan di negoshi ku a traha pa InselAir sali padilanti, no a inkorpor’é den e plan. Lo ta hopi bon si e sèn drenta.

E ‘claim’ ta registrá na CADIVI i ta plaka di benta di ticket na Venezuela. E plaka no por keda transferí na dòler pa Kòrsou. E suma di plaka ta 100 mion dòler. A aserká abogadonan na Venezuela, i nan a konfirmá ku e ‘claim’ di InselAir ta bálido i ta algu signifikativo. Tur kos ta dependé dje tempu pa haña e sèn na Kòrsou. InselAir ta trahando riba esei, pero mirando situashon na Venezuela, sr. Delger a bisa ku e no ta mira ku e plaka lo yega den futuro serkano aki Kòrsou. Ora subi ‘site’ di CADIVI por mira e ‘claim’ di InselAir aparesé.

Tambe sr. Delger a elaborá riba e gritu di G12 ku no mester duna InselAir e sobra 7 mion for di e 33 mion ku e kompania di aviashon a haña di gobièrnu. Delger a splika ku si e 7 mion no yega, InselAir lo no ta alkansá krusa e brùg pa yega na stabilisashon. E 7 mion tin di kubri luna di aprel aki i mei. Fin di mei ta spera ku tin “break-even”, i e kompania por sigui. Si no haña e 7 mion no solamente lo mester baha 250 trahadó mas, pero lo ta un desaster pa Kòrsou. Finalmente sr. Delger a refutá ku InselAir a pidi un suma di 25 mion adishonal banda di e 33 mion.

Bron: Extra

Falta klaridat riba futuro di InselAir tambe a hunga ròl den kanselashon CNSJ

WILLEMSTAD.- Ya kaba tabatin hende ku a antisipá ku por a spera un anunsio no masha bon pa loke ta trata e edishon di e aña aki di Curaçao North Sea Jazz. Prinsipalmente e hechu ku no a kuminsá anunsiá artistanan pa e aña aki for di tempran manera tabata hasi tur e añanan anterior ya kaba tabata un señal ku por a spera un anunsio di desapunto. Finalmente e anunsio a bin ayera ku e edishon di 2017 ta kanselá.

E desapunto ta grandi serka e fanátikonan di e festival. Ya tabatin hende ku a reservá kaba pa bin Kòrsou. Hotèlnan den e área di e aktividat no tabatin lugá mas pero awor aki mester wak kon nan ta bai hasi. Por sierto ku nan tambe a kontribuí parsialmente na e balansa ku a hasi den sentido ku nan ta probechá di e evento pero no ta kontribuí ku niun depchi. E gobièrnu anterior, prinsipalmente e minister di ekonomia i turismo di e gobièrnu anterior Eugène Rhuggenaath a hasi hopi esfuerso pa mantené e festival. Finalmente a tuma e desishon definitivo menshonando komo faktor importante ku no por haña artistanan di taya pa partisipá na e festival.

Informashonnan ku EXTRA a haña ta hasi menshon ku tabatin kontakto ku por lo ménos un artista grandi pa bin Kòrsou ku ta Phil Collins ku tabatin algun aña sin aktua. Pero despues ku el a reanudá su aktividat aña pasá e tabata asina kotisá ku Kòrsou no tabata interesante mas ni pa loke ta trata e pago ku e lo a haña ni tampoko pa e kapasidat ku su konsiertonan lo generá, entre otro na Merka.

Lòs for di e informashon aki, den sektor di turismo mes tin komprenshon pa e desishon anke ku ta rekonosé ku ta un sla. Un eksperto a splika ku e festival di Kòrsou den último añanan a lèn hopi riba buelonan di InselAir pa Aruba, Sürnam, Venezuela, Miami i otro paisnan den nos área. Tur e buelonan aki a kai afó komo ku e kompania no ta disponé for di basta siman kaba di su avionnan grandi ku ta di ground pa departamento di aviashon di Aruba. Konsiderando ku e kompania mes, no opstante hopi esfuerso, ta kologando na un hilu, esei tambe a hunga un ròl den e balansa total ku a hasi. Konekshonnan pa un parti grandi di bishitante a kai afó. Un di e merkadonan importante ta esun di Sürnam ku tur aña di nobo tabata respondé hopi bon.

Awor mester bai wak kiko lo por hasi ainda. Tin algun idea riba mesa, manera e posibilidat pa tene un festival ku artistanan lokal. Un festival asina lo ta ménos kostoso i lo tin ménos preshon riba buelonan pa Kòrsou. EXTRA a tuma nota ku e desapunto ta realmente grandi den e amantenan di bon músika. Nan a spera ku enbèrdat kosnan lo a sigui e aña aki, kisas ku ménos intensidat di último añanan, pero pa e aña aki awor si ta definitivo ku e festival lo no sigui.

Opviamente ku e desishon tin reperkushon pa tur esnan ku tambe ta generá un entrada for di e festival, ku ta un gran kantidat di kompania i individuo. Ménos plaka sigur lo sirkulá den ekonomia ku ya kaba ta den deterioro.

Bron: Extra

Kontentu ku gobièrnu a sigui traha pa yega na kategoria 1

WILLEMSTAD.- Lunanan benidero Yüni, Yüli i Ougùstùs ta masha krusial pa InselAir. P’esei e kompania mester ta den poseshon pa por akapará e lunanan aki kual nan lo bai saka bon probecho  sigur di nan, ta loke ku sr. Gilles Filiatreault di InselAir a splika ayera den parlamento. Ayera gerensia di InselAir a duna presentashon den parlamento.

Señor Filiatreault ta kontentu ku gobièrnu di Kòrsou a sigui traha pa nos yega kategoria 1 den aviashon. El a bisa  ku dos pa tres siman pasá el a haña notifikashon ku gobièrnu di Kòrsou a aprobá pa inisiá e proseso pa haña kategoria 1. Den luna di yüni outoridatnan di FTA lo ta aki pa kontrolá i yega kategoria 1. CCAA i téknikonan di InselAir ta traha duru pa alkansá e proseso aki.

Hopi hende ta puntra si InselAir ta bai Miami bèk. sr. Filiatreault a bisa ku Miami ta un destinashon popular. I pa un kompania di ‘ground’ ta hopi difísil. Sinembargo tòg mester wak si e ruta ta rendabel tantu ora e avion sali for di Kòrsou bai Miami i visevèrsa. Mester wak pa no pèrdè sèn riba e ruta. Su eksperensia den Karibe ku aviashon ta ku ta supsidiá sierto ruta. Kisas esaki lo por ta e kaso di e ruta di Miami ku por supsidiá. No ta kos nobo e ta den mundu di aviashon.

Tambe el a papia ku ta kosta nos 1.6 mion dòler pa por reintegrá den mundu aviashon. tin sierto pais mester renegoshá nos entrada manera Guyana, Sürnam, Haiti i Venezuela. A inisiá e proseso aki. Tambe el a papia dje plan di negoshi ku a traha pa trese InselAir bèk riba pia, i den dje no ta inkluí e potensial di Avianca.

E ta sugerí ora yega lunanan Mei, Yüni i Yüli i Ougùstùs ta luna pik i ta bon pa InselAir ta den poseshon pa por probechá  den e lunanan aki.  E lunanan aki ta masha kritiko pa e kompania di aviashon.

Pa loke ta trata si el a evaluá mal maneho dje kompania. Filiatreault a bisa ku nunka e ta mira bèk atras. E ta trata di pone su “input” i sigui padilanti. E ta traha pa bai dilanti. Tambe el a papia dje proseso di kita hende for di trabou ku no ta nada dushi. Pa loke ta trata posibel froude ku CCAA a konstatá, segun Filiatreault nan no a tende nada mas  pa nan e kaso ta será.

Bron: Extra