WILLEMSTAD.- CPA ke mira desaroyo den haf, CPA ke pa tin diversifikashon den haf, i komo tal e kompania aki ku ta manehá propiedatnan di gobièrnu den haf ta para masha positivo pa ku e proyekto di Dutch Schrier ku ta enserá operashon di un barku pa hasi investigashon den awanan di Kòrsou i otro islanan di Karibe, i tambe stashonamentu di megayatenan.

Esei di akuerdo ku sr. Bert Zwueste, miembro di gerensia di CPA a duna di konosé na okashon di firmamentu di un akuerdo di intenshon i koperashon entre Chapman Shipping di sr. Schrier, Dioro Enterprises di sr. Rudy Pizziolo i gobièrnu.

Segun sr. Zwueste, teniendo kuenta ku e ke mira mas diversifikashon, e ta sòru tambe pa hasi e parti di mantenshon di su propiedatnan pa asina e fasilidatnan ta optimal. CPA ta para positivo pa ku e proyekto aki.

MINISTER CAMELIA
Di su parti Minister sra. Suzy Camelia-Römer na okashon di firmamentu dje akuerdo di intenshon a trese dilanti ku por konsiderá esaki komo un kolaborashon di diferente ministerio den gobièrnu, ya ku e parti di e Ministerio di Finansa p.e. tabata importante. Pero e ta kontentu ku partidonan envolví a sa di pone kabesnan huntu pa desaroyo di Kòrsou. Esei ta importante ya ku si kada ken para riba e pida ku nan ta, lo no por solushoná e asuntu aki.

Den e kaso aki no solamente lo por konta ku aktividatnan manera drechamentu di barku/ yate, pero interesante ta e operashon dje barku Chapman ku lo sirbi komo transporte pa sientífikonan ku ke bini Kòrsou pa hasi investigashon riba organismonan ku lo por a instrumental den e mundu di medisina.

E supmarino di Seaquarium ta hopi importante den esaki ya ku e lo por hiba e profeshonalnan na un profundidat di 300 meter, kual ta algu masha spesial i ku ta eksistí na solamente tres kaminda na mundu. Pues Kòrsou ta hopi eksepshonal riba e tereno aki, aunke hopi hende no ta realisá nan mes den esaki.

Segun e minister, ta hendenan di taya mundial ta traha ku nos profeshonalnan. Por ehèmpel por menshoná aki ku tin un nietu di e legendario Jacques Cousteau ku ta hasi uso di e fasilidatnan riba Chapman pa su investigashonnan.

Bron: Extra

Dioro Enterprises lo krea espasio riba waf

WILLEMSTAD.- Direktor di Dioro Enterprises, sr. Rudy Pizziolo, ta kere ku un asosiashon entre su kompania, tambe Chapman Shipping di sr. Dutch Schrier i gobièrnu pa medio di CPA ta un bon ehèmpel kon lo por traha huntu na desaroyo di Kòrsou. Esei ta loke el a enfatisá na okashon di firmamentu di un akuerdo di intenshon entre e entidatnan menshoná.

E akuerdo aki na momentu ku e konkretisá lo enserá entre otro ku lo krea espasio pa yatenan grandi por stashoná na wafnan den Schottegat. Segun sr. Pizziolo, pa hopi aña su empresa a okupá parti di waf pa distribushon di produktonan manera zeta i margarina. Awor dor di e amistat i e sosiedat komo empresario ku Dutch Schrier, el a bai di akuerdo pa hasi parti di e espasio na waf liber pa e barku Chapman di Schrier por mara.

Chapman ta e barku ku lo bai ofresé e fasilidatnan pa por hasi investigashon den laman. Entre otro Chapman ta ekipá ku e supmarino ku te awor ta den operashon na Seaquarium.

Na interes i bienestar di Kòrsou ta bai hasi esaki. E barku lo por bai na kualke isla den Karibe pa kualke investigashon. Pero naturalmente mester di un kaminda adekuá pa e stashoná. Esei a pone ku den futuro parti di e waf na Parera lo bini liber i ser traspasá pa Chapman Shipping. Asina e sientífikonan lo por abordá e barku i bai hasi investigashon.

Por sierto, esaki ta un tipo di operashon ku ta kanando kaba, i na diferente okashon a bishitá islanan manera Boneiru, Sto. Domingo i Dominica.

Segun sr. Pizziolo, banda di e waf ku lo pone disponibel pa e barku i ku pa hopi tempu a ser usá den e operashon di zeta i margarina Dioro, lo krea espasio tambe pa yatenan grandi por mara den awanan di Parera.

Den bisindario mes tin e kompania Curaçao Marine ku ta akomodá i hasi reparashon riba barkunan di te 30 meter di largura. Pero e ophetivo prinsipal ta pa yatenan grandi por mara, i prinsipalmente den periodo di orkan unda semper doñonan di yate a buska lugánan sigur pa salbaguardiá nan propiedatnan.

Bron: Extra

…Di akuerdo ku Dutch Schrier…

WILLEMSTAD.- Hasiendo uso dje barku spesialmente ekipá ku ta enserá entre otro e supmarino di Seaquarium, Kòrsou i su awanan lo por ta instrumental den deskubrimentu di espesienan ku por yuda den desaroyo di remedinan kontra kanser i otro malesanan. Esei EXTRA por a komprondé for di un deklarashon di e sr. Dutch Schrier, gerente di Chapman Shipping. El a splika ku tin sientífikonan ta bini aki pa abordá e barku i supmarino pa hasi investigashon. I e loke nan optené di e espesienan nan ta bai kuné den nan sentronan di investigashon, ku e sperando di por deskubrí komponentenan pa por produsí medisinanan nobo.

Pues un dia Kòrsou su nòmber lo resoná duru den e mundu ei. Teniendo kuenta ku ta investigashon tin di hasi, nos lo no mira resultadonan ainda den e promé añanan pa motibu ku e ta algu ku ta tuma su tempu. Pero loke e por bisa ta ku por ehèmpel na Hawaii a deskubrí organismonan for di kual a logra produsí sinku (5) diferente medisina kontra kanser.

Pues segun sr. Schrier, e ta entamá e proyekto aki ku e speransa di pone nòmber di Kòrsou riba mapa mundial.

Mas aleu el a splika ku Grupo Seaquarium huntu ku Dioro Enterprises (Rudy Pizziolo) a invertí entre 6 pa 7 mion dòler kaba den e último sinku añanan. E grupo ta kere den e asosiashon i proyekto aki, i komo tal e ta sumamente kontentu di por a konvensé gobièrnu di Kòrsou pa e partisipá no solamente finansieramente, pero pa pone sierto fasilidatnan disponibel den haf pa e proyekto por ta kompleto.

Pero segun Schrier, pa esnan ku konosé su persona pa hopi tempu kaba, semper e ta bini ku ideanan ku ta poko straño. Asina e por papia di e proyekto di Dolfinario ku ta enserá terapia ku dòlfein (Dolphin Therapy).

Ta di komprondé ku hopi hende tabata poko sképtiko den prinsipio, pero awe e proyekto menshoná aki ta un éksito kompleto. Asta e tin di informá ku e aña koriente te awor ta e mihó aña pa loke ta e Dolphin Academy. E aña aki kaba tin un kantidat di 352 famia ku a bini Kòrsou for di eksterior i a pasa 14 dia kada unu ku nan muchanan den kuadro di e terapia.

E proyekto aki ta duna empleo na 35-40 persona ku ta traha den e sentro di Dolphin Academy. Pues Kòrsou ta e pais unda ideanan nobo lo por keda desaroyá, pero hopi hende no ta realisá esei. Kòrsou na su konsepto ta un pais di oportunidat. Pues ku firmamentu di e akuerdo di intenshon ku gobièrnu i CPA e ta masha kontentu di por duna su granito pa desaroyo Kòrsou i pone nòmber di Kòrsou riba mapa mundial, ku tur e potensial ku tin aki.

Bron: Extra