WILLEMSTAD.- Pa algun luna kaba Inselair ta keda asotá ku kritiká dor di e kantidat di retraso ku nan tin, i den sierto kaso hasta kanselashon di buelonan. E kehonan a yega na Fundashon pa Konsumidó kende a urgi Inselair pa ta mas transparente den su manera di duna informashon, i tambe evaluá i strukturá su buelonan di un forma ku ta kumpli ku normanan di aviashon internashonal.

Tambe e fundashon ta kere ku mester yega na normanan fiho di kompensashon, pa kada pasahero na momento ku un kompania di aviashon no kumpli ku loke a palabrá ku e konsumidó. Esaki basá riba normanan internashonal manera stipulá den e Tratado di Montreal.

Relashoná ku esaki, e direktor sr. Edward Heerenveen a bisa EXTRA ku aktualmente nan ta usando e tratado di Montreal. Ora tin retraso ta kompensá e biahero ku sea kuminda, kos di bebe. Den kaso ku tin 8 ora di retraso, Inselair ta duna ticket bek.

“Si e biahero tin retraso pa bai Miami di 6 pa 8 ora, nos ta hiba nan, pero nan ta haña un ticket di Kòrsou pa Miami. E último aki ta bai mas leu ku tratado di Montreal”, ta loke ku Heerenveen a bisa. Esaki ta algu ku no ta haña na Oropa. Ta duna kompensashon den èkstra ticket, ounke no tin un “título” pa hasi esei”.

Sr. Heernveen a splika ku Inselair tin 65 buelo pa dia. E retraso ta konsentrá mas tantu riba ruta di Aruba ku Bonaire, i tin dia riba Miami. “Klaro ku ta haña retraso riba ruta di Trinidad, Sürnam, nan ta sosodé pero no na gran eskala”.

E problema di Aruba i Bonaire ta e avion fokker ku ta bula basta buelo pa dia riba e rutanan aki. E avionnan ta unu ku no mester bula distansianan chikí, i esaki ta kousa hopi “slijtage” i ta hib’e na C-chek. Despues di tantu “landing” mester saka e avion for di servisio, paso ta bin problema ku motor, èrko etc. “Nos no a tuma avion robes, pero mester baha e frekuensia di un avion ku ta bula 15 minüt di distansia”.

Ta bula bai Bonaire 15 minüt, despues ta bin bek 15 minüt. Mester evitá ku ta bula otro buelo kòrtiku i e avionnan mester bula mas leu. E problema ta ku e pasahero no ke bai den un avion propèler, pero ku djèt.

Un dje kosnan ku Inselair ke hasi ta baha kantidat di buelo pa dia riba e ruta Aruba i Bonaire. Aktualmente Inselair ta bulando 7 buelo pa dia for di Kòrsou pa Bonaire i Aruba. Señor Heerenveen a indiká ku si baha e kantidat di buelo pa dia pa solushoná e problema di retraso, tambe nan lo haña kritiká. Pero nan ta planiando pa baha e kantidat di buelo. Pa ki dia esaki lo tuma lugá, sr. Heerenveen no por a bisa EXTRA.

MIONES PEGA NA VENEZUELA

E loke ku mas a hinka Inselair den problema ta un debe mionario ku Venezuela tin na e kompania. Ta trata di un suma di 100 mion dòler ku Inselair tin pega na Venezuela. Sr. Heerenveen a deklará ku gran parti di e sèn aki, nan ta hasi e C-chek. Debí ku e sèn ta pega, e avionnan ku tin di hasi C-chek ta na tera.

E situashon ta bira dia pa dia mas difísil p’e kompania saka avion. Pasombra awor aki enbes di saka e avionnan Fokker, i tin di saka un MD ku kisas 50 pasahero i tòg ta hiba pèrdida.

Segun Heerenveen si nan logra haña sikiera tres luna for di e plaka, nan problema ta resolvé. Mirando esaki ta yega na e konklushon ku e plaka pega na Venezuela ta hinkando Inselair den pèrtá.

Bron: Extra