WILLEMSTAD.- Segun Myra Biegelaar, nr 2 di Par tido Demokrátiko Kòrsou mester introdusí matrimonio entre persona di mesun sekso mas lihé posibel.

‘Awor nos tin e situashon ku hende ku ta biba na Kòrsou por bai Aruba pa un ‘geregistreerd partnerschap’ òf na Boneiru pa un matrimonio entre persona di mesun sekso.

Si nan ta bin bèk Kòrsou, nan por registrá nan mes komo pareha òf partner registrá. Uniko kos ku ta falta ta ku nos mes ta introdusí matrimonio entre persona di mesun sekso.”

Partido PAR ta di akuerdo ku DP. Jesus-Leito ta splika ku PAR ta kontra tur sorto di diskriminashon. Segun Zita Jesus-Leito di partido PAR estado tin nada di bisa ken hende ta skohe komo nan partner di bida. PAR tambe ta pro introdukshon di un matrimonio entre persona di mesun sekso na Kòrsou. Segun partido PAIS Kòrsou mester sigui leinan internashonal i introdusí matrimonio entre persona di e mesun sekso.

Partido Movementu progresivo, bou di liderazgo di parlamentario independiente Marilyn Moses (eks-PAIS), no ta riba e liña di e partidonan menshoná. E partido Movementu Progresivo ta di opinion ku: ‘E instituto matrimonio ta instituí dor nos kreador i esaki el a bisa ta entre un hòmber i muhé. P’esei e hòmber lo bandoná kas di su mayornan pa uni ku su esposa/muhé.”

Pueblo Soberano tampoko no ta di akuerdo ku matrimonio entre persona di mesun sekso, pero ta bisa ku ta derecho di kada ken pa biba huntu.

Hopi otro partidonan ta splika ku nan ta respetá tratadonan internashonal òf ta kere ku ‘nos populashon mester duna su opinion via di un referendum tokante e tópiko”.

Bron: Extra