…Segun dokumentashon den poder di EXTRA…
2016 11 13 – Concept Heads of Agreement 13 November 2016 Guangdong Zhenrong Raffinaderij Curacao by Black Lion on Scribd
WILLEMSTAD.- Di akuerdo ku e dokumentashon kompleto ku EXTRA a haña di e “Heads of Agreement” ku a firma ku e kompania Guandong Zhenrong, tur kos a kana korektamente den e proseso aki. Den dos dia a manera “bulldozer” tur aspekto pa keda kla pa firma djasabra anochi.
E úniko eksepshon den e dokumentunan ta ku no a tende Staten òf informá parlamento di e desaroyonan pero esei no ta nesesario den e fase aki. Esmas, ta e pregunta si tabatin tempu konsiderando e purá ku tabatin. E “Heads of Agreement” no tin un karakter ku ta mara ámbos partido i ta un follow up di Memorandum of Understanding. Ta bon pa bisa ku den e kaso di e dil ku a sera na Aruba ku CITGO tampoko a informá Staten promé ku tabatin un Letter of Intent. Ta despues ku a firma diferente akuerdo a informá e órgano mas haltu di e isla, na momentu pues ku e kompromisonan ta bai bira mas konkreto.
E úniko kos ku EXTRA a haña un poko remarkabel den e proseso ta e forma purá kon tur kos a tuma lugá. Den apénas dos dia a atendé tur aspekto. Hasta a bai Palasio di Gobernador riba djabièrnè atardi lat pa e duna su kontra-firma pa e akto di firmamentu por a tuma lugá. Segun e dokumentunan, ta dia 17 di novèmber Konseho di Minister a reuní i a duna aprobashon na Ministerpresidente pa firma. Pero e firmamentu tabata pendiente di diferente aspekto ku mester a regla riba e mesun dia, inkluyendo un mandato di akshonista pa Refineria di Kòrsou haña aprobashon pa ta parti di e akuerdo. Dia 17 di novèmber den un reunion ekstraordinario di Refineria di Kòrsou (BAVA) a duna aprobashon na e direktor pa e firma.
Riba e mesun dia 17 di novèmber tabatin un otro aktividat purá purá den kua e Hunta di Komisario a bin huntu pa duna aprobashon na e dokumentu ku a firma. Remarkabel ta ku no ta tur miembro tabat’ei. Ta apénas kuater di e shete miembronan a firma e akuerdo, entre nan e presidente- komisario Mariselle Maduro i e miembronan Eric Newton, Don Hernandez (ámbos PAIS) i Ranjit Persaud (Pueblo Soberano). Segun e dokumentunan ku EXTRA tin, e miembro Zoyla Maurera-Tromp no a firma (e dokumentu no ta bisa di kon i si e tabat’ei). E dos otro miembronan Hensley Brion i Rupert Arrindell no tabata presente den e reunion pasobra nan ta den eksterior.
E dokumentashon ta mustra tambe ku e akshonista a bai di akuerdo pa firma e akuerdo. Promé minister Whiteman, representando e úniko akshonista a firma e akuerdo pa dal bai representando e akshonista.
Un parti intrigante di e proseso ta e aprobashon di Konseho di Minister ku ta bisa ku promé ku firma e dokumentu e “due diligence” mester ta kla pa 80 porshento loke aparentemente a tuma lugá tambe.
E nótulonan di e reunion di Konseho di Minister ta bisa ku e Tim Multi- Disiplinario a haña enkargo pa e “due diligence” ta kla pa 80 porshento na momentu ku firma pero niun kaminda no ta resaltá si esei tabata e kaso. For di e hechu ku a firma por saka afó ku esei lo mester tabata e kaso.
E dokumentunan ta mustra kon e negosashonnan a kana te ku awor aki i kiko lo bai hasi próksimamente. E próksimo reto importante ta ku den 28 dia e konsorsio mester presentá un karta di un banko di bon reputashon den kua nan ta mustra ku nan ta sólido i ku nan lo keda kla ku e parti finansiero.
Bron: Extra