Extra | Desishonnan tumá pa gobièrnu aktual por ser kambiá

Desishonnan tumá pa gobièrnu aktual por ser kambiá | Extra

WILLEMSTAD. – Ora ku e gobièrnu nobo di PAR, MAN i PIN sinta, e chèns tei ku lo drai tur desishon tumá kontra di lei pa e gobièrnu aktual.

E tres partidonan ta haña ku ta importante pa esnan envolví den e desishonnan ei, pa nan sa ku e chèns ta grandi ku desishonnan tumá lo drai nan bèk. Den un karta entregá na informador Etienne Ys, e tres partidonan pendiente pa forma gobièrnu nobo, ta pidi su koperashon pa e por kuminsá investigá un ke otro i notifiká esnan envolví riba e partikularidat aki.

Den su enkuentro ku prensa mr. Etienne Ys, informadó a duna di konosé ku partidonan PAR MAN i PIN a aserká informadó Ys ku un petishon pa medio di un karta, ku e petishon pa un koperashon.

E karta di e tres partidonan ta bisa ku nan a haña indikashon fuerte ku e gobièrnu aktual no ta manteniendo su mes na asuntunan koriente i asta ta inisiá maneho nobo.

Ademas e tres partidonan ta hañando señal for di aparato públiko i kompanianan di gobièrnu ku diferente desishon ta ser tumá sin e konsehonan ku ta rekerí i ta kontra di prosduranan ku ta ankrá den lei.

E manera di proseder aki por tin konsekuensianan grave pa maneho ku PAR, MAN i PIN ta bai hiba.

Suskritonan ta di opinion ku e práktikanan aki mester para di inmediato.

Pa e motibu aki e tres partidonan ku ta bai forma e gobièrnu nobo a aserká informador pa averiguá posibilidatnan pa pone e gobièrnu aktual pa mantené nan mes na puntonan koriente i apliká reglanan di toma di desishon manera mester ta.

Ademas mester averiguá kua posibilidat e gobièrnu nobo tin pa revoká desishonnan ku no a sigui prosedernan ankrá den lei.

Un di e sugerensianan ku ta riba mesa, ta pa papia ku konseho hurídiko kaminda ta nesesario.

Ys a duna di konosé ku e pasonan ku e lo bai tuma ta, di pone señora gobernador na altura di e karta aki i e lo por tuma e pasonan nesesario i Ys na su turno lo bisa un konseho hurídiko den kaso ku un gobièrnu nobo sinta i detektá ku tin desishonnan di lei ku a ser tumá, i lo averiguá ta ki instrumento nan rísiko e tin na su disposishon pa hasi algu kontra di esaki.

Partidonan a konsiderá esaki importante pa e hendenan envolví ta na altura ku e desishonnan tumá awor por ser kambiá na nan debido tempu.

Bron: Extra

Geef een reactie

Het e-mailadres wordt niet gepubliceerd. Vereiste velden zijn gemarkeerd met *