Ainda mundu di aviashon di Kòrsou ta pegá den Kategoria 2, sin formulá pa sali

WILLEMSTAD.- E desishon a kai pa pone Oscar Derby un banda for di maneho di Aviashon Sivil i a nombra pa e sektor direktor di VVRP sra Caroline Manuel Gonzales ku e maneho, miéntras ta buska un direktor nobo.

Esaki ta loke EXTRA a komprondé for di nos fuentenan i den kòmbersashon ku presidente di ABVO, Wendy Calmes, el a konfirmá ku Derby no ta enkargá mas ku e maneho di e departamentu di aviashon sivil. A nombra e sra ariba menshoná, pa asina kuminsá ku e proseso pa buska un direktor nobo. Pa loke ta sr Oscar Derby, el a haña 3 luna pa kaba e trabou ku el a kuminsá kuné, esta pa pone Kòrsou bèk den e direkshon di subi kategoria di nos aviashon.

Tambe EXTRA a papia ku Oscar Derby pero el a bisa di no por duna komentario i ta lag’e na minister Camelia Romer ku lo bin ku un deklarashon. El a konfirmá si ku tin negosiashonnan andando.

Historia…

Dia 12 di yanüari 2010 tabata un dia hororoso pa Haiti, na momentu ku un temblor destruktivo a dal e pais aki i a kosta bida di kantidat grandi di hende. Te ku awe, ta sinti e efektonan di esaki na e pais aki pero tambe na Kòrsou. Riba e dia fatal aki, Kòrsou a pèrdè dos siudadano ku tabata na Haiti pa un konferensia di aviashon. Siegfried Francisca, kende na e momentu ei tabata direktor di Departamento di Aviashon i Angelo Isenia ku tabata inspektor.

Despues di fayesementu di Fransisca, Departamento di Aviashon di Kòrsou a kai de un káos total i sin rumbo. Komo konsekuensia ku dos aña despues, Federal Aviation Authority (FAA) a degradá Kòrsou pa kategoria 2, esei tabata na yanüari 2012. Sin duda un página pretu den nos historia, pa loke ta aviashon. Awe mas ku 4 aña despues, ainda gobernantenan no a haña e formulá pa saka Kòrsou for di e Kategoria 2 manda Kategoria 1.

Vários ta e direktornan ku tabata apuntá i tambe kònsùltent ekstranhero ku tabata atkerí, sinembargo e resultado final ketu bai ta meskos. Aparentemente awor ta na e punto mas serka pa kumpli ku tur e rekisitonan, pa FAA konsiderá pa manda Kòrsou bèk kategoria 1, pero esei no ta niun garantia ainda. For di inisio di e proseso na 2012 kosnan a kana struf, vários direktor a bin bai i na inisio no tabatin sèn disponibel, pa koregí puntonan indiká pa FAA.

Den yanüari 2012, FAA a tuma e desishon di degradá Kòrsou pa kategoria 2, a base di un inspekshon ku a hasi na Kòrsou na sèptèmber 2011. Durante di e inspekshon, a resultá ku Kòrsou no tabata kumpliendo ku tur e eksigensianan di e tratado di Chicago. E tratado aki t’ei pa garantisá seguridat di aviashon internashonal. FAA ta kategorisá paisnan sea ku kategoria 1, ku ta nifiká ku e pais ta kumpli ku tur e eksigensianan òf kategoria 2, ku ta nifiká ku e pais no ta kumpli ku tur e eksigensianan. No ta eksistí unkategoria3itaepaista degradá i no su aeropuerto.

Den 2003 i 2008, e Organisashon Internashonal di Aviashon Sivil (ICAO) a hasi inspekshonnan na Kòrsou i for di e tempu ei a konstatá, ku Kòrsou no tabata kumpli ku e eksigensianan.

Na final di 2012, Minister Dominique Adriaens enkargá ku Tráfiko i Transporte, a indiká ku tin avansenan pa loke ta e trabounan pa Kòrsou rekuperá kategoria1 den aviashon, pero un di e problemanan ketu bai ta falta di sèn. El a indiká e tempu ei ku gobièrnu ta hañando yudansa di Ulanda. Segun e minister, su ministerio ta trahando riba e asuntu aki pa un aña i mei kaba. Nan a premirá ku na òktober di 2013, nan lo ta hopi leu. Pero ta kasi kuater aña mas lat i ketu bai nada.

Na 2013, tabatin henter e pesadia di DAE ku a afektá e imágen di Kòrsou i tampoko no a kontribuí na henter e proseso pa subi Kòrsou bèk na kategoria 1. Minister di Tráfiko, Transporte i Planifikashon Urbano di Kòrsou Earl Balborda, a bisa e tempu ei ku “finalmente e ‘rating’ di FAA no solamente tin di aber ku e aerolínea ku ta pidi pèrmit, pero henter e aeropuerto i aviashon den su totalidat. “Mundu tambe ta sinta wak e fayonan.”

Minister Balborda na 2013, a logra firma un akuerdo sumamente importante ku Federal Aviation Authority ( FAA) na Washington. Ta un akuerdo pa yuda promové seguridat i efisiensia den aviashon lokal. E ta fasilitá asistensia tékniko pa Kòrsou di parti di Merka. Por hasi uso di e konosementu di ekspertonan riba tur tereno di seguridat den aviashon di FAA. E akuerdo aki lo mester a yuda tambe pa na un manera duradero, Kòrsou yega i mantené kategoria 1. Un pais ta yega i mantené kategoria 1 na momentu ku e ta kumpli ku tur e eksigensianan di FAA.

Oscar Derby….

Seguidamente Minister Balborda a apuntá Sr. Oscar Derby MBA, pa asumí e kargo di direktor nobo di Departamento di Aviashon Sivil di Kòrsou. Un hòmber ku un trayektoria largu den mundu di aviashon na Jamaica, esaki lo mester a kontribuí pa logra tur e eksigensianan di FAA i pone Kòrsou bèk na kategoria 1 mas pronto posibel.

Na inisio di 2014, un delegashon di e kompania nobo di aviashon AVA Curaçao B.V., a realisá un bishita di kortesia serka Minister di turismo Stanley Palm. Durante e bishita aki, Vise Presidente i Chariman di AVA Curaçao Sr. Olivier Arrindell, a duna Minister Palm un splikashon amplio di establesimentu di AVA Curaçao i e plannan ku tin pa ku mundu di aviashon. Esaki ta bai bira un echo importante, ya ku despues ta bai start un polémika fuerte entre Ava Air i direktor di Departmentu di Aviashon, Oscar Derby i gobernantenan di e sektor aki, ku ta bai laga otro wowo blou. Sin duda kitando hopi tempu balioso, pa konsentrá riba e proseso pa saka Kòrsou for di Kategoria 2.

Minister Balborda a anunsiá tambe den 2014, e plannan pa independisashon di aviashon ku lo mester atraé profeshonalnan i por paga nan tambe pa e trabou ku nan mester bai hasi. E speransa tabata ku promé ku fin di 2015 lo por invitá FAA, ya asina por haña su sertifikashon bèk komo pais den kategoria 1.

Tabata na febrüari 2015, ku Parlamento di Kòrsou tabata ke sa kon a para ku e ‘upgrading’ di Departamento di Aviashon i e leinan korespondiente. Banda di esaki, Parlamento a pidi e minister pa bin informá den un reunion di komishon sentral, tokante tur loke ta trata status di sertifikashon di Aviashon di Kòrsou pa kategoria 1 i tambe e maneho general pa ku aviashon.

Susy Camelia Römer…..

Minister Balborda a tuma su retiru i den luna di mei 2015, Minister mr. Suzanne Camelia- Römer a hura komo minister enkargá ku e kartera di Tráfiko i Komunikashon. Na e okashon ei el a indiká ku gobièrnu a duna tur prioridat nesesario, pa kaba e trabounan e aña ei mes pa Kòrsou su aviashon i su aeropuerto por haña Kategoria 1 di Federal Aviation Agency.

Den e mesun luna ei, Carlos Derby, kende e tempu ei tabata direktor, a splika kon leu e ta ku trabounan pa nos aviashon Sivil por yega kategoria 1 manera e tabata, promé ku 2012 ku el a degradá na kategoria 2.El a duna presentashon di su trabou durante 20 luna na aviashon sivil. “Ta spera ku pa desèmber 2015 nos por alkansá kategoria 1 bèk,” tabata su palabranan.

Na òktober, Gobièrnu a aprobá e struktura nobo di aviashon sivil ku lo ta outónomo. E struktura lo tin 39 funshon, siendo ku na e momentunan ei tabatin 13 funshon.

Promesa….

Miéntras tantu desèmber 2015 i tur e promesanan pa subi bèk na kategoria 1, a keda na promesa. “Por bisa sinembargo, ku Kòrsou ta sigui ku determinashon rumbo pa kategoria 1 den aviashon.

Pero pa yega einan mester di un entidat sivil independiente. Ta sigui traha ku dedikashon i ánimo den e direkshon ei,” asina direktor di Aviashon Sivil Oscar Derby a bisa na desèmber 2015.

Seguidamente, Departamento di Aviashon sivil a kuminsá ku e proseso pa buska ekspertonan, pa diferente puesto haltu den e entidat sivil independiente ku lo bai krea. Manera a indiká kaba, en total lo tabatin mester di 39 hende na e puestonan den e struktura nobo ku a krea. Ta konosí ku di otro banda, a hasi masha purá pa lanta e loke ta yamá Curaçao Civil Aviation Authority (CCAA), ku ta parti di e proseso pa Kòrsou bai bèk kategoria 1 di aviashon.

Na mart di e aña aki, Minister Suzy Camelia- Römer a konfirmá pa prensa, ku Sr. Oscar Derby ku ta hefe di e departamentu su kontrato ta kaba pa fin di yüli, kual su kontrato lo tabata unu di 3 aña. E ta interesá pa sigui traha na departamento di aviashon komo kònsùltent. Minister Camelia-Römer a bisa, ku e ta satisfecho ku e trabou ku sr. Derby a bin ta hasi,pa yuda Kòrsou pa bai bèk kategoria 1. Luna pasá, Derby a bisa EXTRA ku “nos ta na e último fase pa aviashon sivil di Kòrsou yega Kategoria 1.”

Awe e notisia a drenta ku no a prolongá e kontrato di Oscar Derby i a dun’é awor 3 luna pa e kaba su trabou, miéntras e sektor direktor di VVRP ta enkargá tambe ku e departamentu di aviashon i pa kuminsá e proseso di solisitut habrí pa un direktor nobo.

Bron: Extra