WILLEMSTAD. – Ku e veredikto di Korte Sivil ayera, por bisa ku definitivamente e tres yunan di Kòrsou, Ramphis Rietwijk, Rogelio Koeiman (foto) i Gilbertico Felisia lo keda ekstraditá pa Merka.
E huisio sumario sivil ku a keda tratá dia 6 di desèmber tras di lomba, tabata e último rekurso ku tabatin pa trata di impedí e ekstradishon. Ounke ku tin indikashon ku por apelá e veredikto aki.
Ta trata di un veredikto ku hues mr. Lips a motivá ampliamente i ku por sierto no ta laga muchu espasio pa e kontra partido tin éksito den Korte di Apelashon.
Hues a mustra kada aspekto i den un forma amplio a mustra kon e akuerdo di ekstradishon ta hinká den otro i tambe a mustra e kuadro di evakuashon kon ta yega dje leu ei pa ekstraditá un hende.
Hues a mustra riba e dekreto di ekstradishon i e tratado di ekstradishon i tambe e historia di parlamento pa loke ta trata e aspekto aki.
Despues ku Korte di Kasashon dia 15 di novèmber 2016 a indiká ku tur kos a kana bon i ku ekstradishon por tuma lugá, Ministerio Públiko a kuminsá ku e proseso di ekstradishon i tabata warda riba firma di Gobernador pa por ehekutá e veredikto.
Esaki ta momentu ku abogado mr. Eldon ‘Peppie’ Sulvaran a start un huisio sumario sivil pa motibu ku riba e plataforma penal no ta tin nada mas ku por a hasi.
Ayera hues Lips ta rechasá e petishon di e tres kurasoleñonan ku ta e petishon pa prohibí gobernador firma e outorisashon pa ekstradishon.
Esaki ta nifiká ku na e momentunan aki ekstradishon di e tres kurasoleñonan aki ta parse inevitabel i lo por tuma lugá un ora pa otro.
Na e momentunan aki tin dos di e tres sospechosonan aki den aresto preventivo, esta Rogelio Koeiman i Gilbertico Felisia. Ramphis Rietwijk ketu bai polis ta buskando, pero sin éksito.
E petishonnan di parti e outoridatnan merikano a drenta aki na Kòrsou for di dia 11 di sèptèmber 2013 pa Koeiman i Felisia i dia 29 di òktober 2013, e petishon pa Rietwijk a drenta. Pues ta trata di un kaso ku ya tin tres aña kaba andando.
Bron: Extra
Hoe kon de proleet op de foto met oorbellen, tattoos, kettingen en gouden tanden ooit bij de politie worden toegelaten?