WILLEMSTAD.- Djabièrnè awor gobièrnu ta kita mandato for di miembronan ku ta forma parti di Konseho Supremo Elektoral (KSE), i nan no mester atendé nada mas di elekshon.

Esaki ta loke ku presidente di KSE, sr. Raymond “Pacheco” Römer a duna di konosé na EXTRA.
Señor Römer a bisa ku e tambe a tuma nota di vershonnan ku ta sirkulá ku Gobièrnu di Pisas a retirá nan, pero te ayera na momentu ku el a papia ku EXTRA e no a risibí nada. Pero si Gobièrnu a inform’é ku pa djabièrnè awor lo kita mandato for di nan.

Ayera den oranan di mainta e miembronan di KSE a reuní ku Promé Minister sr. Pisas i tambe Minister sr. Ribeiro riba elekshon i e karta ku a manda pa Korte Supremo Oropeo.

Despues di algun ora, KSE a sali for i sala i a indiká di a haña un desishon ministerial dje ministernan. Pero e desishon ministerial no ta konta, pasombra tin e landsbesluit riba mesa di elekshon pa dia 28 di aprel próksimo. E landsbesluit aki tei ainda i t’esei nan ta sigui kuné, segun sr. Römer. Pues nan ta sigui ku e preparashonnan pa elekshon di 28 aprel próksimo.

Si ta bai retirá nan, sr. Römer a bisa di ta warda esei bini. Pero ku el a keda notifiká ku pa djabièrnè ta kita mandato for di nan i nan no mag di hasi nada. P’esei tambe KSE ku tin su hurista, ta konsiderá pa bai korte ku e kaso aki.

Tambe sr. Römer a bisa ku den kurso di awe e lo duna un kontesta riba e desishon ministerial ku nan a haña ayera serka Ministernan sr. Pisas i sr. Ribeiro.

Despues di reunion ku KSE, Promé Minister Pisas a subi trapi bai serka Gobernadó pa entrega e landsbesluit ku ta bisa pa posponé elekshon 28 aprel awor. Sr. Pisas a bisa ku si Gobernadó no firm’é, e lo tin di entrega esaki na Konseho di Minister di Reino. Sr. Pisas ta kere ku tin sufisiente motibu pa para elekshon.

Bron: Extra