Extra | Dosente i personal di Prinses Margriet School a akshoná

Dosente i personal di Prinses Margriet School a akshoná | Extra

WILLEMSTAD.- Ayera for di den oranan di mainta, tur dosente i personal di Prinses Margriet School na Buena Vista a pone trabou abou i a presentá na Sede di sindikato Sitek. Segun e dosentenan, nan ta kansa di e situashonnan na e skol.

E dosentenan a indiká ku ya pa basta tempu ta reina un situashon di vandalismo i agreshon i konstantemente e skol ta bira víktima di ladronisia i atentado. E dosentenan a ekspresá nan preokupashon pa e echo ku tin hopi agreshon na e skol prinsipalmente serka e mayornan.

Resientemente tabatin un kaso kaminda 2 mayor a bringa riba tereno di e skol dilanti tur alumno, asta e mayornan a ekspresá ku siguiente biaha nan lo bin mihó armá. Tambe e dosentenan a ekspresá nan preokupashon pa e echo ku e kura di skol no ta sera. Pa basta tempu kaba a alarmá esaki.

DOS a indiká ku lo drecha esaki durante di e vakashon tras di lomba pero skol a kuminsá bek i e personal di e skol a haña nan ku e mesun situashon. Konstantemente tin mucha ta bira malu debí na stress i inseguridat na e skol. Asta na vários okashon alumnonan a spanta i urina nan kurpa. E dosentenan a indiká bon kla ku nan ta kansa i lo keda den akshon te dia ku e situashon ta remediá.

Bron: Extra

Geef een reactie

Het e-mailadres wordt niet gepubliceerd. Vereiste velden zijn gemarkeerd met *