WILLEMSTAD. – Tur kos ta kla, e loke ku tabata parse di ta imposibel, e siman aki lo bira realidat. E siman aki George Jamaloodin lo keda ekstraditá di Venezuela pa Kòrsou, pero lo sigui mesora pa Boneiru, kaminda ku einan lo enkarsel’é pendiente di mas investigashon pa por logra “dagvaarding” den su kontra.

Pero banda di esaki, tin esfuersonan intenso tumando lugá na Ulanda, pa trata di konvensé Burney ‘Nini’ Fonseca basha abou. Esaki un fuente verídiko a duna di konosé na redakshon di EXTRA.

Den afan pa logra yega na un akusashon fuerte kontra di Jamaloodin, mester bisa ku Nini mester testiguá kontra di George.

Manera ta konosí Jamaloodin ta keda sospechá di ta un di e outornan intelektual den kaso asesinato di Sr. Helmin Wiels i tambe ku e ta metí den otro investigashonnan ku tin di aber ku falsifikashon di dokumentu i froude.

Pa loke ta trata e asesinato di Helmin Wiels, durante e kaso di Elvis Kuwas, esei a bin bon kla dilanti i Ministerio Públiko ta para duru riba e punto aki.

Pa logra un kondena kontra di Jamaloodin, EXTRA a komprendé ku ofisialnan di Ministerio Públiko a biaha pa Ulanda i a bai papia ku Nini Fonseca den afan pa konvensé pa e bisa ken a dun’e plaka pa asesiná Helmin Wiels.

Ministerio Públiko tabatin un dil ku kualke prezu ku kastigu pisá manera Nini tin lo no por nenga i a ofresé Nini e dil enkuestion.

Pero Nini a para duru i no a bai di akuerdo ku e dil ku fiskalnan di Kòrsou a bai kuné pe. Esaki a pone ku fiskalnan a regresá Kòrsou sin por a logra algu for di Nini su boka.

Miéntras tantu tabatin indikashon ku e ekstradishon di Jamaloodin lo no bira un proseso fásil, pa motibu ku Jamaloodin tin un pèrmit di residensia Venezolano. Esaki ta hasi e proseso kompliká pa Venezuela koperá o sea entrega Jamaloodin na hustisia di Kurasoleño.

Algun siman tras di lomba e tribunal di Venezuela a trata e petishon di Ministerio Públiko Kòrsou pa ekstradishon di Jamaloodin i mester indiká ku tur kos ta kla pa e siman aki Jamaloodin regresá Kòrsou.

Pa garantisá no solamente su seguridat, pero tambe posibel huida etcetera, outoridatnan di Ministerio Públiko a opta pa sera Jamaloodin na Boneiru.

Bron: Extra