WILLEMSTAD. – E siman aki e kaso di Frailon Pieter ta kontinuá den korte kaminda ku abogadonan Knoops ta trata di konvensé e tribunal ku e informashon ku nan tin, si e hues tabatin esaki 10 aña pasá, anto e veredikto lo ta otro.
P’esei e kondenado Frailon ta sigui insistí ku un dia e tin di sali liber, pa motibu ku e no a kometé e krímen, o sea e asesinato ku e ta será pe.
Frailon ta sintando kastigu di 24 aña pa asesinato di Albertico Martha dia 8 òktober 2006 na Bandera Grill.
Despues ku korte di apelashon i kasashon a konfirmá e kastigu di korte di promé instansia, na dos okashon Pieter a bai korte pa habri su kaso. E tabata ke pa korte habri su kaso, pasobra e ta konvensí ku no a hasi sufisiente investigashon i e ta inosentemente será.
Dia 25 di òktober di aña pasá Korte a trata su kaso i pa medio di abogado ulandes mr. Knoops i su kasá, a bai korte pa pidi wesnan pa bai di akuerdo pa revishon di e kaso di nobo, pasobra nan ta di opinion ku Frailon ta inosente.
Frailon a reakshoná riba pregunta di wes riba e dia en kuestion kaminda tabata será, i ku ta p’esei e mester a pasa dilanti di Bandera Grill, pasó kaya tabata drùk. El a pasa di e kaminda ei, i a yega na Gosieweg p’e sigui pa su kas na Sta. Rosa.
Frailon a lesa un karta, unda el a gradisí wesnan ku a dun’é oportunidat pa e por a bisa algu, i pa nan por atendé ku su kaso.
“Mi no ta un kriminal manera Ministerio públiko ta pinta mi. Mi ta un siudadano humilde i stima mi famia. Mi ta un persona ku por dominá mi mes den kualke situashon ku mi haña mi”.
Mas aleu Frailon a bisa ku otro siman e ta hasi 10 aña será. Te ainda e no por komprondé kon e por a hañ’é den tal situashon. Den e 10 añanan ku ta pasando nunka el a stòp di lucha pa mustra su inosensia.
Hopi biaha el a yega di trese su puntonan dilanti pa mustra su inosensia pero no a skuch’é.
Frailon a bisa ku e no tabatin problema ku e víktima. Tin hende por konfirmá ku e tabata kumindá e víktima normal. Tin deklarashon di testigu ku ta bisa ku e no tabata na e lugá di e delito. Su telefòn ta mustra ku e no tabata den bisindario di Bandera Grill.
E akusado a pidi pa habri e kaso i hasi investigashon profundo i hustu pe bèrdat sali na kla. “No ta hustu pa sera hende inosente i trese trouma pe”. Frailon a pidi e wesnan pa wak su kaso bon.
“Mi no ta kriminal i no a mata niun hende. Mi ta spera yega na bèrdat pa mi, i famia dje víktima por komprondé ku mi no a mata e víktima. E ta yama danki na “Inocent Proyect” ku a tuma e kaso over.
E siman ku ta drenta aki e kaso un biaha mas lo keda tratá.
Bron: Extra